Noticias

  • La Unidá de Cultura Científica de la Universidá d'Uviéu entra na REDE UCC+i de FECYT

    01 de Xunu 2012

    Mientres la última década entamó más de 850 actividaes de divulgación, con más de 500 investigadores y 35.000 participantes

    Imaxe de los Campus Científicos de Branu, una de les munches actividaes de divulgación de la Unidá de Cultura Científica.

    La Unidá de Cultura Científica de la Universidá d'Uviéu yá forma parte de la Rede d'Unidaes de Cultura Científica y de la Innovación (Rede de UCC+i) impulsada dende'l Ministeriu d'Economía y Competitividá, en collaboración cola Fundación Española pa la Ciencia y Tecnoloxía (FECYT).

    Nos sos once años de vida la Unidá de Cultura Científica de la Universidá d'Uviéu entamó más de 850 actividaes gratuites de divulgación. Les sos iniciatives cuntaron cola collaboración de más de 500 investigadores y el númberu de participantes superó les 35.000 persones. Estos datos converten a la Universidá d'Uviéu nel mayor divulgador científicu de la rexón.

    La inclusión na Rede UCC+i supon formar parte d'unu de los principales axentes d'espardimientu y divulgación de la ciencia y l'innovación n'España, qu'escuerren ameyorar la formación, la cultura y les conocencies científiques de los ciudadanos. La Rede de UCC+i tien como oxetivu fomentar l'intercambiu d'esperiencies y la busca de sinergias pa optimizar los recursos de les Unidaes de Cultura Científica y de la Innovación.

    Los socios de la rede esfruten de ciertes ventayes como la preferencia na inscripción naquelles iniciatives de formación y alcuentros que promueve FECYT, llograr puntuación extra na modalidá correspondiente de la Convocatoria d'Ayudes del Programa de Cultura Científica y de la Innovación xestionada pola FECYT o la inscripción na área institucional de la web ComCiRed. Esti portal ye un puntu d'alcuentru pa intercambiu d'información y recursos ente los miembros de les redes de divulgación y comunicación coordinaes por FECYT).


Buscar