Noticias

  • La ufierta d'itinerarios billingües refuerza la movilidá internacional na Universidá d'Uviéu

    07 de Payares 2013

    La implantación de docencia n'inglés atrai a estudiantes internacionales y favorez la salida d'alumnos de la institución asturiana a otros centros estranxeros

    Alumnos internacionales n'unu de los cursos d'español pa estranxeros impartíos en La Casa de les Llingües.

    El plan de billingüismu de la Universidá d'Uviéu contribuyó a asitiar a la institución como un referente pa los estudiantes internacionales. La iniciativa impulsada dende'l Campus d'Excelencia Internacional supunxo la implantación de 14 itinerarios billingües en graos y 13 en másteres universitarios y favoreció la llegada d'estudiantes estranxeros y tamién la salida d'alumnos de la institución asturiana a otros centros internacionales. Anguaño, más de 600 alumnos estudien el so grau n'español ya inglés y el próximu cursu la Universidá d'Uviéu va cuntar cola so primer promoción de graduaos nun itinerariu billingüe. Los másteres impartíos n'inglés y español tamién gocien d'una bona acoyida ente los alumnos, de los cualos más d'un centenar son estranxeros.

    La Casa de les Llingües foi una de les pieces clave pa impulsar el plan de billingüismu, qu'esixe una meyora efectiva de les competencies llingüístiques d'estudiantes y profesores. Ello ye que la llegada d'estudiantes internacionales pa cursar graos billingües dexóse sentir, por casu, na matrícula de los cursos d'español pa estranxeros.

    Chinos y estadounidenses lideren la demanda de cursos d'español pa estranxeros en La Casa de les Llingües. Casi 3.900 alumnos pasaron por estos cursos dende 2009

    Casi 3.900 alumnos pasaron polos cursos d'aprendizaxe d'español de La Casa de les Llingües dende la so puesta en marcha nel añu 2009. Na actualidá, estadounidenses y chinos son les nacionalidaes que más demanden esti tipu de formación, siguíos polos estudiantes europeos. "Notemos la llegada d'alumnos estranxeros con bon nivel d'inglés, pero escasos conocencies d'español que quieren cursar un grau billingüe y precisen ameyorar el so nivel de castellán", esplica Daniel García Velasco, director de La Casa de les Llingües.

    El plan de billingüismu supunxo'l desenvolvimientu de 42 cursos de capacitación pa los profesores qu'imparten clases nes titulaciones billingües. Un total de 509 docentes pasaron poles aules de La Casa de les Llingües p'acreditar les sos competencies llingüístiques. Los cursos cero pa los alumnos d'estes titulaciones cuntaron en tres años con 546 participantes. La ufierta de graos billingües abarca toles cañes de la conocencia y esti cursu amplióse a cuatro nueves titulaciones na Escuela Politécnica Cimera de Mieres.

    Amás, la comunidá universitaria dispon d'ayudes a la matrícula, financiaes por Cajastur, pa tou aquel que quiera asistir a dalgún de los Cursos Xenerales de Llingües ufiertaos. El Vicerrectoráu d'Investigación y Campus d'Excelencia Internacional concedió hasta'l momentu 535 ayudes a estudiantes, docentes y personal d'alministración y servicios.

    La ufierta de Cursos Xenerales de Llingües representa otru de los servicios con meyor acoyida. Casi un millar d'alumnos matriculáronse anguaño en dalgún de los cursos programaos pa una docena de llingües distintes. Inglés, francés, alemán ya italianu acopen gran parte de la demanda, pero ganen terrenu llingües como'l chinu, el xaponés o l'árabe. Dende l'añu 2009 casi 4.500 alumnos asistieron a dalgún de los Cursos Xenerales de Llingües ufiertaos dende la Universidá d'Uviéu. La Casa de les Llingües supon amás un referente como centru desaminador oficial de los principales títulos internacionales (DELE, Goethe, IELTS, DELF/DALF, PLIDA y CAPLE). Más de 450 alumnos realizaron les pruebes oficiales nel centru.

    Una mayor maña llingüística de los alumnos supon una ventaya a la de valorar la posibilidá de realizar una movilidá internacional, una de les apuestes dientro de la estratexa d'internacionalización de la Universidá d'Uviéu. Más de 2.000 mozos realicen cada añu les pruebes d'idioma pa solicitar plaza en dalgún de los programes de movilidá internacional de la institución académica asturiana.

    Cuidao que la convivencia diaria con estudiantes d'otres nacionalidaes tamién facilita'l manexu d'una llingua estranxera, el Vicerrectoráu de Internacionalización y Posgráu y La Casa de les Llingües ponen en marcha cada cursu los programes Tándem y a-Duo que, con distintos formatos, ameyoren les competencies llingüístiques de los participantes. Más de 2.500 estudiantes sumáronse estos programes dende 2009.


Buscar