Noticias

  • La I Feria Académica de la Universidá d'Uviéu espón la ufierta d'estudios pal próximu cursu

    16 de Mayu 2014

    La cita va axuntar nel Edificiu Históricu'l próximu 22 de mayu a les facultaes y escueles pa dar a conocer los requisitos d'accesu y perfiles profesionales de cada titulación

    Alumnáu de la Universidá d'Uviéu n'unu de los campus de la institución

    La Universidá d'Uviéu saca la so ufierta d'estudios a la cai pa dar a conocer toles sos titulaciones de grau y posgráu y arreglar les duldes d'estudiantes y families. La I Feria Académica de la Universidá d'Uviéu se celebrará'l próximu xueves, 22 de mayu, nel patiu del Edificiu Históricu n'horariu de 17:00 a 20:00 hores. El públicu asistente va tener oportunidá de percanciar tola información sobre'l completu catálogu d'estudios que se va impartir el próximu cursu: 51 graos afechos al Espaciu Européu d'Educación Cimera (EEES), qu'inclúin trés dobles graos y 15 titulaciones con itinerarios billingües impulsaos dende'l Campus d'Excelencia Internacional.

    Como novedá dientro del catálogu d'estudios de grau, l'añu que vien va empezar a impartise'l Doble Grau n'Inxeniería Civil ya Inxeniería de los Recursos Mineros y Enerxéticos na Escuela Politécnica de Mieres. Tratase de la tercera doble titulación ufiertada pola Universidá d'Uviéu, xuntu al Doble Grau n'Alministración y Dirección d'Empreses (ADE) y Derechu, y el Doble Grau en Física y Matemátiques.

    Los futuros estudiantes pueden escoyer ente 51 graos de toles cañes de conocencia, qu'inclúin tres títulos dobles y 15 itinerarios billingües impulsaos pol Campus d'Excelencia Internacional.

    Nel so apueste pola internacionalización, la institución académica tamién estiende la so ufierta d'itinerarios billingües a la titulación de Química, colo que los estudiantes pueden escoyer ente una quincena de graos con docencia n'inglés que-yos abrirán la puerta a cuntar con un certificáu que se va incorporar al Suplementu Européu al Títulu.

    La feria, entamada dende'l Vicerrectorado d'Estudiantes, supon un puntu de referencia p'aquellos alumnos que'l próximu añu empecipien la so andadura universitaria. Les 19 facultaes y escueles qu'integren la Universidá van tar presentes na cita con un espaciu propiu nel que los asistentes van poder realizar consultes sobre caúna de les titulaciones qu'imparten pa conocer requisitos d'accesos, salíes profesionales o perfiles d'ingresu. Representantes de cada centru van atender al públicu asistente.

    El Centru d'Orientación ya Información al Estudiante (COIE) tamién va tar presente na feria p'arreglar cualquier dulda relativa a la ufierta académica de la institución, les Pruebes d'Accesu a la Universidá (PAU) -qu'arrinquen el próximu 3 de xunu na so convocatoria ordinaria-, les beques disponibles pa estudiantes, posibilidaes d'agospiamientu pa universitarios o les distintes víes d'accesu a estudios universitarios.

    La ufierta de posgráu tamién va tar presente na I Feria Académica de la Universidá d'Uviéu. El Centru Internacional de Posgráu va cuntar con un stand nel que percanciar tola información sobre los másteres universitarios, programes de doctoráu y títulos propios que van poder cursase l'añu que vien na institución académica asturiana. El catálogu de másteres universitarios incorpora 8 nueves titulaciones. El CIP ufierta pal cursu 2014-2015 un total de 47 másteres universitarios nos que la internacionalización y la collaboración col mundu empresarial son exes clave de la formación.

    La Casa de les Llingües tamién va esponer la so ufierta de cursos de formación n'idiomes y d'español pa estranxeros. Amás, el Serviciu de Deportes de la Universidá va cuntar con un stand nel que públicu va poder conocer toles instalaciones y ufierta d'actividaes nos distintos campus.


Buscar