Noticias

  • ‘La escena ambulante' empecipia la so xira teatral con sellu asturianu

    30 de Mayu 2012

    El ciclu, entamáu pola Universidá d'Uviéu, va llevar los montaxes de cinco compañíes asturianes a una decena de localidaes del Principáu

    Presentación de la segunda edición del ciclu.

    La Universidá d'Uviéu presenta la segunda edición de La escena ambulante, un ciclu que va llevar el teatru y la danza fechos n'Asturies polos escenarios d'una decena de localidaes del Principáu a lo llargo del mes de xunu.

    La escena ambulante, promovido pol Vicerrectorado d'Estensión Universitaria y Comunicación, cuenta cola participación de cinco compañíes profesionales asturianes que van poner sobre les tables montaxes de teatru y danza con un variáu espectru d'estilos y autores. La entrada va ser llibre hasta completar l'aforu en toles representaciones que se van llevar a cabu n'A Veiga, Cuideiru, Villaviciosa, Pravia, Cangas, La Pola L.lena, Moreda, L.luarca, A Caridá y La Felguera.

    Mientres la presentación del ciclu'l vicerrector d'Estensión Universitaria y Comunicación, Vicente Domínguez, reafitó'l compromisu de la Universidá cola cultura "p'apurrir el nuesu granu de sable nestos tiempos de crisis". Amás, destacó que'l sofitu a los autores y profesionales del teatru asturianu "ye daqué prioritariu, non por una cuestión de chovinismo, sinón porque son tan bonos como cualesquier otros y tenemos que curialos".

    Representantes de toles compañíes participantes nesta edición allegaron a la presentación del ciclu y estimaron el sofitu brindáu pola Universidá al teatru asturianu. La escena ambulante va xirar con montaxes de Teatru Marxe, Teatru del Norte, Hixénicu Papel, El Caleyón del Gatu y Zig-Zag Danza.

    El director de Teatru del Norte, Etelvino Vázquez, estimó "el sofitu decisivu de la Universidá al teatru dempués d'un añu en grau cero". Vázquez apuntó amás que La escena ambulante "da la oportunidá de llegar a localidaes pequenes, que de normal nun tienen oportunidá de ver teatru y eso ye importante". El perfil variopinto del públicu del ciclu fixo que Teatru del Norte decantárase por un clásicu del XX" como La zapatera prodixosa de Lorca, "un testu bien graciosu y que funciona perbién cola xente".

    La coreógrafa Estrella Moreno estimó'l buecu que la programación fixo a la danza "porque n'Asturies la oportunidá de xirar nun circuitu de danza ye solo ciencia ficción". El montaxe de Zig-Zag Danza, Dempués de cortar el verde, ta influyíu pola estética de Klimt, según esplicó la coreógrafa, y pon n'escena la evolución de la relación ente una pareya a lo llargo de la vida "con una visión esperanzadora".

    Teatru Marxe opta por un baluarte del teatru del absurdu cola puesta n'escena de Deliriu a dúu de Ionesco. "Un cantar al pesimismu en clave de comedia", según defín l'actor José Antonio Lobato, quien aprovechó la ocasión pa estimar que "la Universidá volviera amestarse al fechu teatral dempués d'enforma tiempu".

    El calquier asturianu de La escena ambulante reafitase cola puesta n'escena de Low Cost, de Maxi Rodríguez per parte d'Hixénicu papel. El dramaturgu asturianu desatacaba esta mañana "la máxima vixencia d'esti testu nun momentu como l'actual nel que tou abarátase".

    A lo último, Moisés García, miembru d'El Caleyón del Gatu, animó al públicu nuevu a allegar a ver la so adaptación de Machbet. "Ye importante que recuperemos o nun perdamos a esi públicu nuevu nos patios de butaques", señaló al dar relevancia al venceyu qu'hai d'esistir ente teatru y Universidá.

    PROGRAMA DE REPRESENTACIONES DE ‘LA ESCENA AMBULANTE'

    TEATRU MARXE. Deliriu a dúu (Eugene Ionesco)

    • Vienres 1 de xunu, 20:00 hores. Casa de Cultura d'A Veiga.
    • Vienres 15 de xunu, 20:00 hores. Casa de Cultura de Cuideiru.

    TEATRU DEL NORTE. La zapatera prodixosa (Federico García Lorca)

    • Domingo 3 de xunu, 20:30 hores. Teatru Riera Villaviciosa.
    • Vienres 8 de xunu, 20:00 hores. Auditorio José Barrera de Pravia.

    EL CALEYÓN DEL GATU. Macbeth (William Shakespeare)

    • Xueves 14 de xunu, 20:00 hores. Teatru Toreno en Cangas.
    • Sábadu 16 de xunu, 20:00 hores. Teatru Vital Aza en La Pola L.lena.

    ZIG ZAG DANCIA. Dempués de cortar el verde

    • Vienres 1 de xunu, 20:00 hores. Centru Cultural de Moreda. Teatru Cine Carmen.
    • Xueves 28 de xunu, 20:00 hores. Teatru del IES de L.luarca.

    HIXÉNICU PAPEL. Low Cost (Maxi Rodríguez)

    • Llunes 25 de xunu, 20:00 hores. Auditoriu As Quintes d'A Caridá.
    • Miércoles 27 de xunu, 20:00 hores. Nuevu Teatru de La Felguera.

Buscar