Noticias

  • La donación de sangre aumenta na Universidá magar la cayida nel númberu d'estudiantes

    14 de Xunu 2016

    La última campaña saldóse con 1.682 donaciones, que representen un 4,62% de les estracciones totales rexistraes n'Asturies. La institución académica y el Centru Comuñal de Sangre y Texíos apurren los premios y distinciones del presente curso

    Foto de familia de los galardonados, las autoridades y representantes de hermandades y asociaciones de donantes de sangre
    Les coleutes de sangre desenvueltes nos distintos campus de la Universidá d'Uviéu caltuviéronse nos últimos años ya inclusive s'amontaron llixeramente magar l'amenorgamientu del númberu d'estudiantes. Les aportaciones recoyíes na institución académica asturiana suponen yá'l 4,62% de les donaciones totales del Principáu. Estos datos punxéronse de manifiestu esta mañana con ocasión de la entrega de los premios y distinciones de la Campaña Universitaria de Donación de Sangre correspondiente al cursu académicu 2015-2016.
     
    La entrega de los galardones, que coincidió cola celebración güei del Día Mundial del Donante de Sangre, cuntó cola presencia de Elisa Miguélez, vicerrectora d'Estudiantes, y María del Carmen Muñoz Turrillas, directora técnica del Centru Comuñal de Sangre y Texíos, amás de los representantes de les asociaciones y hermandaes. Los estudiantes premiaos na presente campaña fueron Cristina Acevedo Sánchez, de Relaciones Llaborales y Recursos Humanos (beca de 600 euros), Samuel  Campillo Álvarez, d'Inxeniería Informática (beca de 600 euros), y Dolores Casariego Artola (y-book). El diploma a la solidaridá recayó na Escuela d'Inxeniería de Mines, Enerxía y Materiales d'Uviéu. Recoyó la distinción el so director, Francisco Blanco Álvarez.
     
    Balance
     
    Nel presente curso 2015-2016, el númberu de donaciones de sangre llograes nel conxuntu de los puntos d'estracción de la Universidá foi de 1.682. La cifra ye abondo similar a la rexistrada n'años precedentes, cola salvedá de la medría del pasáu añu motiváu por un llamamientu a la donación realizáu mientres un periodu momentaneu d'escasez de hemocomponentes.
     
    La cifra d'altes, persones qu'alleguen a donar per primer vegada, foi de 370, lo que representa un 22% sobre'l total d'estracciones llograes na Universidá mientres la campaña d'anguaño. Esto ye, una de cada cinco donaciones recoyíes nestes coleutes correspondióse a un donante nuevu. Esta circunstancia ye especialmente importante una y bones la incorporación de nuevos voluntarios que sustituyan a los de más edá resulta imprescindible pa garantizar el futuru de la donación, entá ye más teniendo en cuenta'l progresivu avieyamientu de la población asturiana.
     
    Elisa Miguélez, vicerrectora d'Estudiantes, estimó la collaboración de tolos participantes y destacó que la so actitú altruista, caltenida y amontada nos últimos años, contribuyó a ameyorar la salú de les persones y a salvar vides. "La donación ye l'actu humanu que más vides salvó nel mundu", recordó. La Organización Mundial de la Salú escoyó anguaño como lema del día mundial el El sangre conéctanos a toos. La vicerrectora sorrayó que "donar sangre ye'l sinónimu esactu de compartir vida".  "Donar sangre ye'l meyor regalu vital", concluyó.
     
    María del Carmen Muñoz Turrillas, directora técnica del Centru Comuñal de Sangre y Texíos, que presentó'l balance de la campaña, indicó que la situación demográfica pola que traviesa Asturies, con una población cada vez más avieyada, fai que la incorporación de nuevos donantes y especialmente de persones nueves constituya una prioridá. La directora añedió que los centros qu'apiguren a estos mozos nel so periodu de formación son, poro, instituciones d'especial interés pa la promoción de la donación de sangre. "La campaña de donaciones demuestra que valores como l'altruísmu y la conciencia social entá siguen vivos ente ellos", destacó.
     
    La Campaña Universitaria de Donación de Sangre desenvuélvese cada añu en dos fases. La primera, ente los meses de setiembre y avientu. Y la segunda, ente los de febreru y abril. 

    Imaxes:


Buscar