Noticias

  • La directora xeneral de Facebook España, Irene Cano, fala sobre redes sociales y marketing na Facultá d'Economía y Empresa

    06 de Febreru 2013

    Más de 500 profesores y alumnos allegaron a la xornada técnica entamada pola Cátedra Fundación Ramón Areces

    Imaxe de la conferencia sobre'l papel que les redes sociales xueguen na sociedá de güei, ufiertada por Irene Cano.

    La directora xeneral de Facebook España, Irene Cano, ufiertó esta mañana na Facultá d'Economía y Empresa una conferencia sobre'l papel que les redes sociales xueguen na sociedá de güei. Cano tornó a l'Aula Magna de la Facultá, na que cursó los sos estudios d'Alministración y Dirección d'Empreses, nel marcu de la xornada Marketing online, entamada pola Cátedra Fundación Ramón Areces.

    Más de 500 estudiantes y profesores atarraquitaron la estancia pa escuchar la ponencia d'Irene Cano, quien destacó'l papel alcanzáu poles redes sociales que se fixeron "protagonistes" de la comunicación nos últimos años. Por ello, indicó que cada vez hai más xente que ta utilizando estes plataformes p'atopar a posibles veceros pa los sos productos.

    La máxima responsable de Facebook n'España esbilló dalgunes de les estratexes que llograron que la compañía sía la plataforma más utilizada en tol mundu con más d'un millón d'usuarios y resaltó el papel que los teléfonos móviles xueguen nesa evolución. "El móvil ye'l presente, non el futuru", remarcó. Les opciones de segmentación y les inminentes posibilidaes de realizar busques específiques asitien a esta rede social como una poderosa ferramienta de marketing, según esplicó Irene Cano.

    El director de la Cátedra Fundación Ramón Areces de Distribución Comercial Juan Trespalacios foi l'encargáu de presentar a Irene Cano. La clausura de la xornada corrió a cargu del vicerrector de Planificación Económica, Convenios y Contratos, Santiago Álvarez.

    Imaxes:


Buscar