Noticias

  • La Cátedra Ángel González edita la primer revista científica sobre poesía española contemporanea

    21 de Xineru 2015

    Prosemas, una publicación con vocación internacional y periodicidad añal, va recoyer trabayos d'investigación orixinales y rigorosamente inéditos, de calter teóricu o críticu

    La directora de la Cátedra Ángel González, Araceli Iravedra, presenta la revista xuntu al vicerrector d'Estensión Universitaria y Comunicación, Vicente Domínguez.

    La Cátedra Ángel González de la Universidá d'Uviéu acaba d'editar Prosemas, la primer publicación nel ámbitu académicu que centra'l so campu d'investigación na poesía española contemporanea. Prosemas. Revista d'Estudios Poéticos estrénase con un númberu especial sobre Ángel González, nel qu'una cuidada selección d'autores y artículos proponen una revisión y actualización de los estudios sobre la obra y figura del poeta uvieín, Premio Príncipe d'Asturies de les Lletres y Doctor Honoris Causa pola Universidá d'Uviéu.

    La publicación, de calter científicu y vocación internacional, va tener una periodicidad añal y va sirvir de plataforma d'espardimientu pa trabayos d'investigación orixinales y rigorosamente inéditos, de calter teóricu o críticu, con un apartáu específicu p'artículos que'l so oxeto d'estudiu sía la poesía d'Ángel González.

    El llanzamientu de Prosemas ufierta un monográficu que, según la directora de la Cátedra, la profesora Araceli Iravedra, pretendi ser "una puesta al día, un exerciciu de reevaluación de les formes y sentíu de la escritura del poeta que, dende enfoques críticos innovadores, esquice nes sos zones menos transitaes". Como exemplu, preséntase una bibliografía actualizada sobre'l poeta, que recueye tantu la so producción poética y crítica como les publicaciones de distinta índole que la tomaron como oxetu d'estudiu.

    El primer númberu ye un monográficu dedicáu a Ángel González nel qu'una docena d'autores españoles y estranxeros reevalúan y actualicen la obra del poeta asturianu

    Una docena d'autores d'universidaes españoles y estranxeres, como la Université Blaise Pascal (Clermont-Ferrand), Université de Rennes 2, Universidá Nacional de Mar de la Plata o University of Illinois in Urbana Champaign, sumáronse a esta revisión y actualización de la obra d'Ángel González.

    Nesti percorríu encétase, por casu, la intertextualidad na poesía del autor, analizada por Marta B. Ferrari, de la Universidá Nacional de Mar de la Plata, que fai referencia nel so estudiu a la gran variedá de intertextos, de procedencia lliteraria, bíblica, filosófica, mitolóxica y del mancomún cultural, que pueden atopase na so estensa obra. La esperta traza, amás, un mapa d'autores presentes nos versos d'Ángel González, dende Garcilaso, Góngora, Quevedo, Bécquer o Espronceda hasta Antonio Machado, Juan Ramón Jiménez o poetes que rescata de la Xeneración del 27 como Vicente Aleixandre, Jorge Guillén, Pedro Salinas y Luis Cernuda, ensin escaecer autores de la segunda metá del sieglu XX como Blas de Otero y Claudio Rodríguez.

    Destaca tamién nesti monográficu l'exame de la ‘antipoesía' realizáu por Claude Le Bigot, de la Université de Rennes 2, que se entruga: "¿Foi Ángel González un poeta postmoderno?". Sostien Le Bigot nel so analís que "l'ambiente moral, autoritariu y cínicu de la sociedá franquista, la mediocridá intelectual triunfante nes instituciones controlaes pol Réxime, llevenlu a replantegase les posibilidaes subversives del llinguaxe". Ángel González, comenta, "antemánase a les evoluciones de la dómina del desencantu magar la democratización del país, que nun fixo más que fortalecer el sentimientu de potencia apangada de la palabra pa tresformar el mundu". "Cónstanos –añede– que la antipoesía foi para Ángel González la so manera de redinamizar l'exerciciu de la poesía y sacala de la clausura ideologizada".

    Ente los artículos inclúyese l'analís que realiza Ángel Luis Luján Atienza, de la Universidá de Castiella-La Mancha, sobre los escasos sonetos nuna obra poética "básicamente comunicativa, comprometida y esperimental", según les sos palabres. Sol títulu Nun acaba equí la hestoria, el críticu lliterariu Luis Bagué repasa la vixencia d'Ángel González na poesía española actual, una influencia especialmente vultable n'autores qu'empiecen a publicar al filu de los años ochenta, ente que en Apuntes pa una poética xerontolóxica nel Ángel González de ‘Nada grave', John C. Wilcox, de la Universidá de Illinois, detiense nos poemes de los últimos años publicaos tres la so muerte. Completen la nómina d'espertos que s'enfusen na obra d'Ángel González los profesores María Payeras Grau, Evelyne Martín Hernández, José Enrique Martínez, Bénédicte Mathios, Verónica Leuci y Laura Scarano, Miguel Ángel García y Begoña Camblor Pandiella, encargada de la bibliografía.

    Prosemas cunta con una edición impresa, pero va tar coles mesmes accesible en formatu dixital abiertu a tol mundu dende la plataforma electrónica REUNIDO (http://www.unioviedo.es/reunido/), de la Universidá d'Uviéu. Los artículos que s'unvien a la revista van ser revisaos por evaluadores esternos antes de la so publicación.

    Enllaces Rellacionaos:


Buscar