Noticias

  • L'Alianza contra la Fame y la Malnutrición n'España sollerta de los problemes de malnutrición xeneraos pola crisis

    06 de Marzu 2014

    Los espertos reparen una medría notable d'obesidá ente les persones con rentes más baxes por llevar un patrón alimentario pocu fayadizu y sollerten de la vulnerabilidá de la población infantil

    Rueda de prensa de presentación del informe de conclusiones.

    El director de l'Alianza Española contra la Fame y la Malnutrición n'España (ACHME), Benitu Aláez, sollertó esta mañana del agravamientu de los problemes de malnutrición na sociedá española por causa de la crisis económica. El catedráticu de Derechu Constitucional de la Universidá d'Uviéu destacó que xuníu a estes circunstancies reparóse "un notable aumentu del problema de la obesidá ente les persones de rentes baxes, que cada vez son más numberoses."

    L'Alianza, promovida pola Universidá d'Uviéu, presentó esta mañana les conclusiones del alcuentru d'espertos celebráu'l pasáu ochobre n'Uviéu y Avilés. Benitu Aláez aprofió que la incidencia de la obesidá ta directamente rellacionada coles distintes clases sociales, con una mayor proporción de patrones alimentarios menos fayadizos, como la ingesta de carne o embutíos, nes más baxes ente que les altes gasten mayores recursos económicos na compra de fruta y verdura. 

    El catedráticu apuntó a la población infantil como la más vulnerable a la obesidá y señaló que la dificultá d'aportar a comedores escolares, por culpa de la crisis, ta quitando a munchos neños de recibir una bona nutrición y l'aprendizaxe d'una alimentación fayadizo.

    "Nel contestu español non puede falase nin de fame nin de malnutrición, sinón de dificultá alimentaria", sorraya l'informe, que sollerta del aumentu de la vulnerabilidá social, cola medría, dende 2008, de persones per debaxo del estragal de la probeza".

    L'Alianza contra la Fame y la Malnutrición ye una iniciativa mundial de progresu que venceya organizaciones ya instituciones d'idees allegaes implicaes na llucha contra la fame y la malnutrición. Pretende ser un foru qu'axunte voluntaes y entame actuaciones concretes pa erradicar la probeza estrema y la fame, unu de los primeros Oxetivos de Desenvolvimientu del Mileniu establecíos pola ONU nel añu 2000.


Buscar