Noticias

  • Investigadores valoren l'impactu urbano y patrimonial del tresformamientu de les villes portuaries asturianes

    04 de Avientu 2013

    Los espertos de la Universidá d'Uviéu analicen les principales perdes y aportaciones del procesu de modernización qu'esperimentaron bona parte de les poblaciones costeres del Principáu a lo llargo de les dos últimes décades

    La última remodelación del nuevu puertu deportivu de Llanes al llau de una instantánea d'esi mesmu espaciu tomada nel añu 1929. SEMEYA: Mari Cruz Morales La última remodelación del nuevu puertu deportivu de Llanes al llau de una instantánea d'esi mesmu espaciu tomada nel añu 1929. SEMEYA: Mari Cruz Morales

    El tresformamientu qu'esperimentó la mariña asturiana nos últimos años tuvo un impactu notable sobre'l patrimoniu tradicional ya industrial que se caltenía nes redolaes portuaries y les villes marineres. Investigadores del Departamentu d'Hestoria del Arte y Musicoloxía de la Universidá d'Uviéu analicen les principales perdes y aportaciones del procesu de modernización qu'esperimentaron apocayá bona parte de les poblaciones costeres del Principáu.

    L'equipu, lideráu pola catedrática María Soledad Álvarez, desenvuelve un intensu trabayu de campu p'analizar y documentar los cambeos esperimentaos en distintos puntos de la mariña, ente otros: Avilés y Candás, na zona central; Llanes y Ribesella na oriental; y Tapia de Casariego y A Veiga nel occidente asturianu. La investigación Espacios portuarios y villes costeres. Modelos d'estratexes urbanístiques y patrimoniales de rexeneración y tresformamientu de la mariña asturiana nun inclúi la ciudá de Xixón, que'l so estudiu foi oxetu d'un trabayu anterior.

    "Nesti tresformamientu, pesaron poco les iniciatives relatives al caltenimientu del patrimoniu y los puertos históricos y primó la instalación xeneralizada de puertos deportivos, con destrucciones d'antigües instalaciones, muelles y elementos industriales", esplica la catedrática d'Hestoria del Arte. Exemplos d'eses perdes patrimoniales significatives seríen el puertu vieyu de Llanes, los Altos Fornos, la Térmica ya instalaciones de Ensidesa n'Avilés, l'antigua Pescadería de dicha ciudá, la Siderúrxica de Moreda y la mayor parte del patrimoniu industrial de Xixón, como tamién de la importante industria conservero de la rexón, de la qu'apenes resten testimonios.

    La sostenibilidá ambiental y una atención especial a los servicios comuñales son dos señes d'identidá que caractericen la modernización de la mariña de la rexón. La puxanza de la construcción tamién foi un factor determinante pa camudar radicalmente los pequenos núcleos urbanos asitiaos na mariña.

    L'estudiu cuestiona delles intervenciones que nun respetaron el patrimoniu industrial y la sostenibilidá futura de ciertos equipamientos

    Anque la reinvención de les localidaes costeres nun siguió un patrón únicu, el modelu de tresformamientu esperimentáu en Xixón sí influyó claramente munches de les actuaciones, según señalen les especialistes. Nel casu de la recuperación de les dos grandes urbes costeres, Xixón y Avilés, les espertes cuestionen si los modelos d'intervención pudieron ser menos destructivos col patrimoniu industrial esistente y tamién apunten escontra la rentabilidá real de nuevos equipamientos que la so sostenibilidá futura puede ponese n'entredichu.

    De la pesca al puertu deportivu

    L'estudiu de los cambeos esperimentaos nes villes de menor tamañu refundia acciones de la mesma naturaleza en casi tolos pequenos puertos: construcción de puertos deportivos, desapaición d'edificaciones industriales como rules y almacenes o la so rehabilitación pa convertiles n'espacios públicos con distintes finalidaes. La creación de nuevos paseos marítimos, dos tales piatonales y parques tamién han redibujado la contorna urbana de manera significativa, lo mesmo que los nuevos equipamientos d'arte público y moblame urbanu.

    Los proyectos de remodelación de les pequenes villes xeneraron nuevos espacios públicos qu'escuerren un modelu urbanu más amigable. Como exemplu, l'estudiu apunta la rehabilitación de dellos edificios portuarios d'interés como la Cetárea de Tapia de Casariego y les rules de Ribesella y L.luarca, ente otros. Otres aportaciones destacables frutu de les inversiones realizaes nos últimos años seríen, amás de les importantes operaciones llevaes a cabu nel waterfront de Xixón, que dieron orixe a nueves sableres, siendes y parques y al equipamientu con arquitectures d'interés y escultura pública, analizaos n'otru proyectu anterior, la rexeneración integral de la Ría d'Avilés y la dotación de nuevos patrimonios en redol a ella (escultura Avilés, Ruta del Aceru, Centru Internacional Óscar Niemeyer); la musealización d'espacios portuarios (puertu de San Esteban de Pravia) y la rehabilitación de vieyos edificios o la creación d'otros nuevos con fines museísticos (Muséu del Calamar en L.luarca, Muséu Etnográficu Juan Pérez Villamil en Puertu de Vega, Muséu de Tito Bustillo en Ribesella); la intervención artística de Ibarrola na escollera del puertu de Llanes; Parques Escultóricos de Candás y del Cabu Peñes; la Sienda Escultórica de les 12 Pontes d'A Veiga, etc.

    Collaboración internacional

    El proyectu d'investigación, financiáu pol Ministeriu d'Economía y Competitividá, va esponer les sos primeres conclusiones definitives nun seminariu internacional que'l próximu mes de xunu va celebrase na Universidá d'Uviéu. Espertos nesti campu d'otres universidaes españoles y europees van tomar parte nel alcuentru. El grupu d'investigación trabaya dende va una década en collaboración con equipos del mesmu campu que desenvuelven el so llabor n'otres localidaes del Arcu Atlánticu. Ente ellos, cabría destacar la collaboración col equipu del profesor Guy Saupin de la Universidá de Nantes.

    Equipu investigador

    • María Soledad Álvarez Martínez
    • María de las Cruces Morales Saro
    • Rosa María García Quirós
    • Natalia Tielve García
    • María del Carmen Adams Fernández
    • Rebeca Menéndez Marino
    • Laura Mier Valerón
    • José María Rodríguez-Vigil Reguera

    Semeya de portada

    Imaxe de la ría d'Avilés, na que s'encaró una rexeneración urbanístico y ambiental fonda. SEMEYA: Soledad Álvarez

    Imaxes:

    Enllaces Rellacionaos:


Buscar