Noticias

  • Investigadores trabayen nel diseñu d'un dispositivu pal diagnósticu d'enfermedaes neurolóxiques y tumorales

    27 de Febreru 2015

    El prototipu, que funciona como un test d'embaranzu, rexistra los niveles de exosomas, que pueden sollertar de la presencia d'una patoloxía

    D'esquierda a derecha, Pablo García, Gemma Gutiérrez, Robert Coles, Carmen Blanco, María Matos, Miriam Oliveira, Olvido Iglesias, Carmen Palacios, Eva Cernuda y Esther Serrano.

    Investigadores de la Universidá d'Uviéu trabayen nel diseñu de dispositivos pa facilitar el diagnósticu y monitorización d'enfermedaes neurolóxiques y tumorales. L'equipu d'investigación d'Emulsiones, Nanovesículas y Bioanálisis ta desenvolviendo un prototipu, que'l so funcionamientu sería similar al d'un test d'embaranzu, que se basa na detección de exosomas, visícules de pequeñu tamañu que secretan toles célules y pueden atopase en fluyíos biolóxicos, como el sangre o la orina. Investigaciones recién confirmaron que la detección d'una cantidá d'estes visícules percima de los valores consideraos normales ye significativa dende'l puntu de vista clínicu.

    L'equipu de la Universidá d'Uviéu trabaya na síntesis de visícules artificiales pa perfeccionar los métodos d'analises

    El procesu d'aislamientu de los exosomas resulta bien aballador, por ello'l primer pasu del proyectu d'investigación, financiáu pol Ministeriu d'Economía y Competitividá, ye sintetizar visícules artificiales que mimeticen les naturales pa poder facilitar el desenvolvimientu del sistema d'analís.

    Los primeros prototipos van dir empobinaos al diagnósticu d'enfermedaes neurolóxiques como la esclerosis múltiple, anque'l so diseñu puede afaese a la detección d'otres enfermedaes (tumores urinarios, melanoma, etc.) modificando la naturaleza de dalgún de los sos componentes.

    Cómo ‘ensamblar' una visícula artificial

     

    Pa desenvolver una visícula artificial que mimetice los exosomas, el investigadores de les Árees de Química Analítica ya Inxeniería Química escoyeron los componentes que más s'asemeyen a los de les visícules celulares naturales. Los científicos recurren a distintes técniques pa ensamblar los elementos y formar pequenes visícules de tamañu y característiques similares a les que quier retrucar. La metodoloxía dexa un aproximamientu socesivu al modelu biolóxicu.

    El siguiente pasu na investigación ye la puesta a puntu de la plataforma d'analís. El Campus d'Excelencia Internacional financió la estancia d'una de el investigadores del grupu, la profesora Carmen Blanco, na Universidá de Cambridge pa recibir formación específica nesti campu.

     

    El dispositivu resultante va ser asemeyáu a los test d'embaranzu. Una tira de nitrocelulosa va llevar xuntaos los elementos que prinden les visícules que se topen na amuesa de sangre o orina. Gracies a un reactivu qu'apurra color, va ser posible pescudar si los niveles de exosomas son normales o non.

    Proxecto d'investigación: Exosomas sintéticos pal desenvolvimientu de sistemes de diagnósticu clínicu (EXOMED)

    Grupu d'investigación Emulsiones, Nanovesículas y Bioanálisis.

    Mª del Carmen Pazo Medina, Mª del Carmen Blanco López, Olvido Iglesias Fuelga, Gemma Gutiérrez Cervelló, Pedro Oliva Nacarino, Walter Javier Villafani Echazú, Esther Serrano Pertierra, María Matos González y Pablo García Manrique.

    Collaboradores:

    José Coca Praos (Profesor Eméritu d'Inxeniería Química, Universidá d'Uviéu), Eva Cernuda Morollón (Serviciu de Neuroloxía, Hospital Universitariu Central d'Asturies), Mar Valés Gómez (Centru Nacional de Biotecnoloxía, CSIC, Madrid), María Yáñez Mo (Hospital La Princesa, Madrid), Robert Coles y Myriam Oliveira Rodríguez (Máster de Biotecnoloxía, Universidá d'Uviéu).


Buscar