Noticias

  • Investigadores recuperen el craniu d'un rinoceronte lanudo na cueva de La Rexidora en Ribesella

    23 de Avientu 2014

    El profesor Diego Álvarez Lao llevó a cabu los trabayos d'escavación y afitamientu de la pieza, una de les meyor calteníes d'esta especie na península Ibérica

    Ilustración d'un rinoceronte lanudo. Imaxe: Diego Álvarez Lao

    Investigadores de la Universidá d'Uviéu recuperaron una gran porción d'un craniu de rinoceronte lanudo (Coelodonta antiquitatis) nes escavaciones en cursu na Cueva de La Rexidora en Cuerres (Ribesella). Esti craniu constitúi'l más completu d'esta especie topáu hasta agora n'Asturies y unu de los meyores de la península Ibérica. El rinoceronte lanudo vivió nel Principáu fai unos 30.000 años y sumió d'Europa y Asia fai  12.000 años.

    Diego Álvarez Lao, investigador del Departamentu de Xeoloxía de la Universidá d'Uviéu, desenvolvió los trabayos d'escavación y afitamientu de la pieza afayada'l pasáu branu en La Rexidora. "Los llabores d'escavación y estracción del craniu riquieron un cuidu estremu yá que se  atopaba en condiciones de gran fraxilidá y parcialmente incluyíu dientro d'una gruesa tiez estalagmítica, lo qu'enzancó enforma la so estracción", esplica Álvarez Lao.

    El craniu de La Rexidora ye singular yá que caltien los dos maxilares superiores con casi tolos sos dientes, el cielu la boca y parte de la base del craniu. Los afayos de restos craniales d'esta especie na península Ibérica, salvo esceiciones, suelen acutase a pieces dentales aisllaes. Los dos dientes de lleche que caltien el craniu dexen envalorar que l'individuu yera nuevu y morrió a los 4 ó 5 años d'edá.

    Al afayu d'esti craniu xúnese-y el d'un quexal d'otru individuu de la mesma especie de la cual yá recuperar fragmentos na primer campaña d'escavaciones. Estos nuevos fósiles de rinoceronte lanudo constitúin, por tanto, exemplares d'alta singularidá y de relevante valor científicu pa entender cómo yeren les poblaciones ibériques d'esta especie mientres el Pleistocenu Cimeru.

    El xacimientu de La Rexidora tien el so orixe nuna trampa natural, una torca na que los animales cayeron por fuerza. Hasta'l momentu atopáronse restos de bisonte d'estepa, rinoceronte lanudo, venáu, renu o hiena. La presencia de delles d'estes especies indica qu'entós daquella Asturies tenía un clima bien fríu y grebu y que'l paisaxe sería de tipo estepa, con predominiu de vexetación herbal y dellos árboles tipo coníferes.

    El rinoceronte tendría un tamañu asemeyáu al del rinoceronte blancu africanu actual. Esta especie algamaba los 4 metros de llargor, 1,85 m d'altor a la cruz y un pesu que superaría los dos tonelaes. Presentaba una elevada gorrumba tres la frente  y una pelame trupa que-y cubría tol cuerpu. Tenía dos cuernos, unu nasal bien llargu (d'hasta 1,3 metros de llargor), curvu y esplanáu (como un sable), y otru frontal de menor llargor.

    Exemplares momificados pola conxelación topaos en Siberia dexaron conocer detalles de l'anatomía y l'apariencia del rinoceronte lanudo como la so pelame o los cuernos. Tamién les representaciones d'artistes Paleolíticos calteníes en cueves como Rouffignac o Chauvet dexen constancia de la presencia d'estos animales. Hasta'l momentu na península Ibérica atopáronse restos de rinoceronte lanudo en 27 xacimientos, cuatro d'ellos asturianos.

    Imaxes:


Buscar