Noticias

  • Investigadores recreen la evolución urbana d'Uviéu dende la dómina medieval hasta l'actualidá

    04 de Ochobre 2013

    Profesores de los departamentos de Xeografía y Hestoria de la Universidá d'Uviéu sinteticen la hestoria urbana de la ciudá por aciu l'analís de miles d'amueses testuales, arqueolóxiques y cartográfiques.

    D'esquierda a derecha, Miguel Calleja, Felipe Fernández y Gaspar Fernández Cuesta

    El primer planu fidedignu de la ciudá d'Uviéu foi llevantáu en 1853 por Joaquín Mª Fernández, catedráticu de matemátiques de la so Universidá. Esi dibuxu d'una pequeña capital de provincies, que rondaba entós los 14.000 habitantes, representa la síntesis de mil años d'hestoria urbana. Pero amás ye'l puntu de partida d'una llarga serie de planos y fotografíes aérees que documentan gráficamente los tres formamientos contemporaneos de la ciudá.

    Sobre materiales fragmentarios y heterogéneos, un equipu de xeógrafos ya historiadores de la Universidá d'Uviéu llogró reconstruyir ya interpretar la evolución urbana d'Uviéu de forma integral. Per primer vegada ufiértase una llectura evolutiva de la hestoria de la ciudá, dende la so fundación na alta Edá Media hasta los nuesos díes.

    El proyectu Vrbe, qu'agora se presenta nuna esposición en LAUDEO, forma parte d'un ambiciosa iniciativa que tamién va estudiar les ciudaes de Xixón y Avilés

    Tou esti trabayu vese agora na esposición Vrbe I. Uviéu: la construcción histórica de la ciudá, nel Centru Cultural d'Estensión Universitaria LAUDEO. L'amuesa dexa contemplar la espansión y tresformamientu d'Uviéu a lo llargo de los sieglos, al traviés de mapes, fotografíes aérees, imaxes de satélite y materiales audiovisuales. Esta iniciativa forma parte d'un proyectu más ambiciosu qu'inclúi la reconstrucción de la evolución espacial y urbanístico de Xixón y Avilés.

    Los materiales creaos pa la esposición son frutu d'una llarga trayectoria d'investigaciones desenvueltes na Facultá de Filosofía y Lletres. Los centenares de monografíes sobre la ciudá histórica producíes nes últimes décades fueron sintetizaes nesta amuesa. Inclúyense tamién resultaos d'investigaciones en marcha. La resultancia ye la creación de nuevos materiales orixinales que, dispuestos de forma cronolóxica, componen un cuadru inéditu de la hestoria de la ciudá.

    Un percorríu al traviés de los sieglos

    La esposición onde puede contemplase la resultancia del trabayu va poder visitase na sala d'esposiciones de LAUDEO (Edificiu Históricu de la Universidá d'Uviéu) hasta'l próximu 8 de noviembre de forma gratuita. L'amuesa ta estremada en trés partes: el mediu físicu, la construcción histórica de la ciudá y la ciudá contemporanea.

    La primer parte de la esposición describe'l mediu físicu onde se va desenvolver la ciudá d'Uviéu, incidiendo nos condicionantes naturales que marcaron el so desenvolvimientu. A partir d'ende, empieza'l percorríu pola construcción de la ciudá histórica, que va dende l'alta Edá Media hasta mediaos del XIX. Tres paneles aúnan una ventena de planos que fueron dibuxaos espresamente pa esta esposición. La reconstrucción hipotética del Uviéu de la monarquía asturiana va dexando pasu a la so caracterización como see episcopal. La concesión del fueru, a finales del sieglu XI, supon un tresformamientu sustancial al convertise en centru artesanu y comercial que'l so protagonismu correspuende a los vecinos. Tres la quema de 1521, la ciudá recomponse y acentúa el so calter señorial, dibuxando finalmente'l perfil urbanu que se representa nel planu de 1853.

    El postreru estremáu de la esposición da testimoniu de la ciudá contemporanea, una evolución reflexada en planos y fotografíes que constaten la so crecedera espacial y les alteraciones del modelu urbanísticu utilizáu pa entamalo. Mientres la etapa de construcción de la ciudá burguesa, o industrial, son visibles les buelgues del modelu d'enanche: trama ortogonal y mazanes zarraes nel centru y barrios obreros ya industria na periferia. La segunda etapa, la de la ciudá industrial, caracterizase pola reconstrucción posbélica (Plan Gamazo) y polos primeros planes xenerales d'ordenación qu'inclúin mazanes abiertes, zonificación d'usos y víes rápides de comunicación (Plan Mesones). A partir de la década de 1980 empieza la etapa de la ciudá posindustrial. De primeres, cola democracia, dignifícase la ciudá heredada y encétense importantes operaciones de rexeneración urbana (Petrina Verde, Campus del Milán y otres). Más tarde, prosiguen y rematen, nuna ciudá apoderada pol sector públicu, los grandes proyectos interiores (Palaciu de Congresos, Centru comercial Los Praos), pero tamién xúntase una nueva xeneración de polígonos residenciales. Parte d'ellos son grandes pieces (La Florida, Monte Cerrao, La Corredoria) que, sumaos a los restantes, casi doblen la estensión de la ciudá. La cual, coles mesmes, descarga y periferiza parte de los sos conteníos adquiriendo calter difusu.

    El proyectu Vrbe va tener continuidá cola realización d'amueses similares pa los casos de Xixón y Avilés, nes que los espertos agoren una importancia destacada del mar a la de definir el dibuxu urbanu de la ciudá. La dómina romana va tener un pesu específicu nel casu de Xixón, ente que la hestoria urbana d'Avilés faise esperar hasta los tiempos medievales. En dambos casos, el papel protagonista de la industria pesao en sieglu XX van ser factores decisivos nel so desenvolvimientu contemporaneu.

    Comisarios

    Miguel Calleja (Departamentu d'Hestoria)

    Gaspar Fernández Cuesta (Departamentu de Xeografía)

    Felipe Fernández (Departamentu de Xeografía)

    Equipu d'investigación

    María Álvarez (Departamentu d'Hestoria)

    Soledad Beltrán (Departamentu d'Hestoria)

    Juan Carlos Castañón (Departamentu de Xeografía)

    Ramón Fernández Prieto (Departamentu de Xeografía)

    Marién Madera (Departamentu de Xeografía)

    Carmen Rodríguez (Departamentu de Xeografía)

    Sergio Tomé (Departamentu de Xeografía)

    Imaxes:


Buscar