Noticias

  • Investigadores radiografíen l'impactu de la crisis nel gastu de les families españoles n'ociu

    03 de Avientu 2014

    La recesión provocó una cayida de más de 200 euros per habitante al añu nel presupuestu dedicáu al tiempu llibre

    Los espectáculos cultural y deportivu lideren el ranking de gastos n'entretenimientu, siguíos de l'alquisición de tecnoloxía de la información

    La fonda crisis camudó la economía doméstica de les families españoles. Investigadores del Departamentu d'Economía de la Universidá d'Uviéu analizaron l'impactu de la recesión n'unu de los capítulos que primero sufre los retayos: el gastu n'ociu y cultura. Los datos estadísticos revelen que xustu antes del españíu de la crisis, en 2008, el gastu per cápita n'ociu y cultura algamara los 1.300 euros al añu por habitante, el so máximu históricu. Tres año más tarde, en 2011, esa cantidá cayó en picáu hasta asitiase per debaxo de los 1.100 euros, asitiándose en niveles similares a los de 2004.

    L'equipu lideráu pol profesor Levi Pérez trazó una radiografía macroeconómica de cómo afectó la crisis al gastu que realizamos n'ociu y cultura utilizando como fonte los datos añales de Gastu en Consumu Final de los Llares (Household Final Consumption Expenditure) que rexistra EuroStat.

    L'enclín a destinar menos dineru a ociu y cultura ye xeneralizada en toa Europa, pero nel casu español les tases de variación del gastu son muncho más acusaes. Hasta l'añu 2007 el gastu n'ociu de los españoles crecía percima del 3 per cientu respectu al añu anterior, l'impactu de la crisis asitia esa tasa nun -4% nel añu 2009. Mientres la crisis, n'Europa y n'España siguióse'l mesmu enclín anque les oscilaciones rexistraes nel nuesu país fueron siempres más acusaes.

    "El siguiente pasu de la nuesa investigación trata d'esplicar el porqué d'esa evolución del gastu", esplica Levi Pérez, "un primer factor pa esclariar les variaciones ente España y Europa ye que, ensin dulda, la crisis nun afectó igual al nuesu país qu'a otros de la Unión Europea nos que'l nivel de renta disponible caltúvose más altu."

    Cómo gastamos el dineru nel nuesu tiempu llibre

    El primer pasu del trabayu realizáu polos especialistes de la Universidá d'Uviéu foi acutar el conceutu ociu pa estremar qué entra y qué non nesi capítulu. Los investigadores tomaron como referencia la clasificación estadística que s'utiliza pal cálculu de los índices de precios y qu'inclúi una categoría d'Ociu y Cultura.

    Los espectáculos cultural y deportivu lideren el ranking de gastos n'entretenimientu, siguíos de l'alquisición de tecnoloxía de la información

    Dientro d'ella, les cifres revelen que'l mayor gastu n'ociu de los españoles van al pagu se servicios culturales, deportivos y d'ociu y a los xuegos d'azar. El segundu conceutu nel ranking de gastu ye l'alquisición de tecnoloxía rellacionada cola información (PC, tablets, videoconsoles, etc.) o col audiovisual (cámares fotográfiques y de vídeu, televisores, equipos de música, etc.)

    Por detrás asítiense'l gastu vacacional, la compra de bienes recreativos y d'equipamientu (xuguetes, hobbies, xuegos, equipamientu deportivu, mascotes, xardinería, etc.) o l'alquisición de llibros y material de papelería. Cabo señalar que tou lo relativo al consumu en restoranes y hoteles queda fora d'esti cómputu yá que esiste una categoría estadística específica.

    El proyectu L'impactu de les recesiones económiques sobre'l gastu n'ociu: un analís macroeconómicu foi financiáu dientro de la convocatoria d'ayudes pa grupos d'investigación emerxentes financiada pola Universidá d'Uviéu y el Conceyu de Xixón nel añu 2013. Una iniciativa impulsada al traviés del vicerrectorado d'Investigación y Campus d'Excelencia Internacional.

    Equipu de investigación

    • Levi Pérez (Investigador Principal)
    • Pelayo Arbués
    • Cristina Muñiz
    • Patricia Suárez

    Imaxes:


Buscar