Noticias

  • Investigadores van instalar una estación meteorolóxica na Antártida pa evaluar el cambéu climáticu

    05 de Mayu 2015

    Científicos de la Universidá d'Uviéu van estudiar sobre'l terrén los datos de la cubierta nival pa establecer un patrón de destemple

    D'esquierda a derecha, Javier Fernández Calleja, Susana del Carmen Fernández Menéndez, Carmen Recondo y Juan José Pion García.

    Investigadores de la Universidá d'Uviéu trabayen nel equipu internacional que va instalar una estación meteorolóxica de la Antártida pa cuantificar l'impactu del cambéu climáticu nel casquete polar. Los científicos van recoyer datos termopluviométricos cola nueva estación, qu'amás ta fornida con unos sensores especiales que se van instalar a gran fondura nel suelu pa dictaminar cómo se tán portando los suelos xelaos ante'l calentamientu global. La misión va dir un pasu más allá y va cuntar con espertos en teledetección que van tratar de convertir la información arrexuntada in situ n'imaxes de radar.

    Miembros del equipu internacional collaboren amás cola NASA na prueba d'equipamientos científicos. Les estremes condiciones del continente xeláu sirven como escenariu perfectu por que los investigadores prueben ciertos preseos tecnolóxicos que se van incluyir nes futures misiones espaciales que viaxen a Marte pa percanciar datos de los suelos xelaos marcianos. Los espertos creen que les característiques de ciertos terrenos antárticos podríen ser similares a les de los llugares nos que amerizarán les sondes por eso la información arrexuntada polos sensores puede resultar pervalible.

    Miembros del equipu internacional collaboren cola NASA pa probar equipamientu científicu de cara a futures misiones en Marte.

    La profesora Susana del Carmen Fernández, investigadora del Departamentu de Xeoloxía, va ser la encargada de tomar datos de la cubierta nival sobre'l terrén pa tratar d'establecer un patrón de destemple. Al pie de ella van trabayar los profesores Javier Fernández Calleja y Carmen Recondo, que se van ocupar de too lo relativo a les tecnoloxíes de teledetección. El proyectu, financiáu pol Ministeriu d'Economía y Competitividá, aúna a xeólogos, xeógrafos, físicos ya inxenieros d'universidaes españoles, portugueses, cheques y ruses.

    La primera de les trés espediciones programaes va llevase a cabu'l próximu avientu. L'allugamientu de la estación meteorolóxica entá nun ta decidida y embaráxense allugamientos como la área continental o la Isla Decepción. "Ye importante garantizar que l'allugamientu sía'l fayadizu por que'l material nun sufra daños porque les condiciones ellí son bien estremes", esplica Susana Fernández, que va formar parte del equipu que va realizar la primer espedición a finales d'añu.

    Proxecto investigación: Caracterización y evolución de la cubierta nival y el so efectu nel réxime térmicu del permafrost y la capa activa nes isles Livingston y Decepción (Antártida). PERMA-SNOW.

    Financiamientu: 250.000 euros del Ministeriu d'Economía y Competitividá.

    Plazu de desenvolvimientu: 3 años.

    Equipu d'investigación

    Universidá d'Uviéu. Susana del Carmen Fernández Menéndez, Javier Fernández Calleja, María del Carmen Recondo González y Juan José Peón García.

    Universidá de Alcalá de Henares. Miguel Ángel de Pablo Hernández, Miguel Ramos, Miguel Ángel Hidalgo Moreno, Manuel Prieto Mateo y Juan Javier Jiménez Cuenca.

    Universidá de Lisboa: Carmen Mora y Gonzalo Vieira.

    Masaryc University (Checoslovaquia). Kamil. Laska, Daniel Nývlt y Filip Hrbácek.

    Universidá de Moscú. Z. Engel

    Co-Investigadores nel proyectu REMS-MSL de NASA: Miguel Ramos y Miguel Ángel de Pablo.

    Imaxe banner portada

    Instalaciones del campamentu establecíu na península de Byers. Semeya: Javier Cristobo

     

    Imaxes:


Buscar