Noticias

  • Investigadores afayen qu'un parásitu de cría protexe los niales d'otra especie frente a depredadores

    20 de Marzu 2014

    Un trabayu publicáu en Science describe per primer vegada los beneficios que'l parasitismu puede tener sobre les especies hospedadoras

    Los pitucos de cornexa negra (derecha) y críalo européu (esquierda) n'unu de lo niales monitorizados polos investigadores.

    Un equipu internacional, lideráu por investigadores de la Universidá d'Uviéu – CSIC –, y de la Universidá de Valladolid, en collaboración cola Universidá de Neuchâtel (Suiza), describió per primer vegada cómo una especie de cucu protexe los niales del so hospedador frente a los depredadores. El trabayu, qu'acaba de ser publicáu pola prestixosa revista Science, revela aspeutos beneficiosos del parasitismu de cría y establez una relación ente individuos de distintes especies qu'ameyora'l so ésitu reproductor.

    Mientres 16 años, los investigadores estudiaron y monitorizaron 741 de niales de cornexa negra (Corvus corone corone) y analizaron la so relación col críalo européu (Clamator glandarius), una especie de parásitu de cría de la familia del cucu. El trabayu ta lideráu por Daniela Canestrari, investigadora de la Unidá Mista d'Investigación en Biodiversidá (Universidá d'Uviéu – CSIC) y del Departamentu de Bioloxía d'Organismos y Sistemes de la Universidá d'Uviéu, xuntu con Diana Bolopo, José M. Marcos y Vittorio Baglione, de la Universidá de Valladolid, y Gregory Röder y Ted C. J. Turlings, de la Universidá suiza de Neuchâtel.

    Les conclusiones del estudiu desvelen que la presencia d'un pollu de críalo nel nial puede en realidá apurrir beneficios a les cornexes, convirtiendo la relación de parasitismu nun mutualismo del que dambos salen beneficiaos. Los esperimentos de campu demostraron que los pitucos de críalo protexen el nial gracies a una secreción con un golor bien desagradable que producen cuando son afrellaos y qu'estorna a los depredadores. Esti mecanismu de defensa química contribúi a la supervivencia de tolos pitucos del nial, tantu del críalo européu como de la cornexa, al caltener alloñaes a aves rapaces y mamíferos. Los analises químicos probaron que la secreción desprendida polos pitucos de críalo européu contien numberosos compuestos ácidos y tóxicos que llogren estornar a el depredadores. Esta acción protectora de los cucos sobre los sos hospedadores enllárgase de 16 a 18 díes, primero que los pitucos abandonen los niales. "Les conclusiones del estudiu déxennos ver que la relación ente un parásitu de cría y les sos hospedadores ye más complexa de lo qu'hasta agora pensábamos y ábrense nueves puertes p'analizar meyor eses interacciones", esplica la doctora Daniela Canestrari.

    Espertos lideraos pola Universidá d'Uviéu, en collaboración col CSIC, la Universidá de Valladolid y l'Universidá de Neuchâtel (Suiza), estudiaron mientres 16 años en más de 700 niales la relación ente'l críalo européu y la cornexa negra

    El críalo nun espulsa del nial a los fíos del so hospedador, pero compite con ellos pol alimentu que los padres lleven al nial y con frecuencia puede provocar la muerte de dalgunos de los sos pollos. Nesti sentíu, el críalo provoca un costo al hospedador, una traza característica de les especies parásites.

    Sicasí, al analizar los datos percanciaos mientres 16 años en 741 niales asitiaos na redoma de la localidá lleonesa de La Sobarriba, los investigadores comprobaron que n'años con muncha densidá de depredadores, los niales parasitados lleguen a producir, de media, más críes de cornexa con al respective de los niales non parasitados, al sufrir menos perdes por depredación. Nestos años, la relación ecolóxica ente'l críalo y la cornexa dexa de ser parasitismu (na que'l parásitu "gana" y el hospedador "pierde") y tresfórmase en mutualismo (dambos llogren beneficios). El trabayu de campu desenvueltu analizó coles mesmes la influencia que la presencia d'un parásitu tien sobre l'esfuerzu que los padres realicen p'alimentar a les críes, amosando qu'un pollu de críalo supon un esfuerzu menor comparáu con un pollu de cornexa, debíu al menor tamañu del parásitu.

    La estratexa reproductiva de munches especies de cucos ye bien conocida y consiste en poner los güevos nel nial d'otra ave (el hospedador) y dexar que la so proxenie sía criada polos padres adoptivos. En munchos casos, curiar a un cucu supon un costo considerable pal hospedador porque lleguen a espulsar al restu de güevos o pitucos o monopolizan l'alimentu, provocando la muerte por inanición. Munches especies desenvolvieron estratexes de defensa contra los parásitos de cría como la capacidá de reconocer y espulsar los güevos d'otres especies o la posibilidá de defender el nial viviegamente contra los parásitos adultos. Sicasí, delles especies de hospedadores, como la cornexa, nun tienen nenguna defensa contra los parásitos de cría y polo tanto los sos niales pueden ser parasitados con frecuencia. Esta ausencia de defenses representa una interrogante abiertu pa munchos científicos. L'estudiu de Canestrari y collaboradores propunxo que, nel casu de la cornexa negra, la falta de defenses frente al críalo débese al efeuto beneficiosu que'l parasitismu de cría puede apurrir n'años d'alta densidá de depredadores.

    El proyectu d'investigación desenvueltu pol equipu internacional foi financiáu al traviés del Plan Nacional de Ciencia del Ministeriu d'Economía y Competitividá y fondos apurríos pola Xunta de Castiella y Llión.

    Datos de la publicación

    From Parasitism to Mutualism: Unexpected Interactions Between a Cuckoo and Its Host

    Autores:

    Daniela Canestrari, (1), (2); Diana Bolopo, (3); Ted C. J. Turlings, (4); Gregory Röder, (4); José M. Marcos, (3); Vittorio Baglione (3), (5).

    (1) (2) Departamentu de Bioloxía d'Organismos y Sistemes de la Universidá d'Uviéu ya investigadora de la Unidá Mista d'Investigación en Biodiversidá, del CSIC.

    (3) Departamentu Agroforestal de la Universidá de Valladolid.

    (4) Institutu de Bioloxía de la Universidá de Neuchâtel (Suiza).

    (5) L'Institutu Universitariu d'Investigación en Xestión Forestal Sostenible (Universidá de Valladolid).

    Imaxe banner de portada

    Pitucos de corneja negra y cucu nun mesmu nial reclamando alimentu.

    Imaxes:


Buscar