Noticias

  • Investigadores desenvuelven les primeres ferramientes pa la xestión forestal de la castañal de monte baxu

    11 de Marzu 2015

    El trabayu de campu de más de tres años dexó realizar un refechu inventariu de la principal especie arbórea del noroeste peninsular y diseñar preseos pa optimizar el so aprovechamientu

    Asturies dispon de 451.317 hectárees de superficie forestal arbolada, de les cualos 80.560 hectárees son de mases de castañal de monte baxu.

    El grupu d'investigación en Sistemes Forestales Atlánticos (GIS-Forest) de la Universidá d'Uviéu collaboró col Centru Tecnolóxicu Forestal y de la Madera (CETEMAS) na realización de la primer ferramienta de xestión forestal pa la castañal de monte baxu, la especie más relevante en tol noroeste de la Península y que cubre casi'l 18 per cientu de la superficie arbolada d'Asturies. La castañal de monte baxu ye aquel que se refixo por cepes y nun foi llantáu pola mano del home.

    Más de tres años de trabayu de campu enmarcáu nel Plan Estratéxicu de la castañal y financiáu pola Alministración del Principáu d'Asturies, dexaron al grupu d'investigadores ellaborar un refechu inventariu d'altores, diámetros, característiques de la masa, etc., que tracen la radiografía de cómo s'atopa la especie anguaño y dexen diseñar preseos pa planiar una xestión forestal sostenible y que maximice el beneficiu que puede estrayese d'esta masa arbórea.

    Países como Francia fueron pioneros a la de poner en marcha esta xestión forestal pa esta especie. La investigación desenvuelta creó ferramientes pa la estimación de la crecedera y la producción, tales como ecuaciones de biomasa, una función de perfil, una ecuación d'índiz de sitiu, tarifes de cubicación con clasificación de productos, tables de producción, diagrames de manexu de densidá o modelos que dexen determinar l'índiz de sitiu a partir de variables ambientales.

    L'estáu d'abandonu de les mases forestales y les condiciones sanitaries de los árboles son les prioridaes d'actuación, según los espertos

    L'abandonu de les mases forestales ye'l primer y principal problema que los investigadores atoparon al evaluar la situación. "El potencial d'esta masa ye bien eleváu y tase perdiendo pola falta d'actuación de propietarios particulares y alministraciones públiques", esplica María Menéndez Miguélez, investigadora del grupu que la so tesis doctoral, codirigida por Pedro Álvarez (Grupu d'Investigación en Sistemes Forestales Atlánticos. GIS Forest), y Elena Canga Líbano (CETEMAS), céntrase nel desenvolvimientu de ferramientes de xestión de la castañal de monte baxu. Dende'l puntu de vista sanitariu la salú de la especie nun ye bona. "Apreciemos una presencia bastante importante de chancro, un hongu qu'enfusa poles feríes y cortes del árbol amenorgando la so vitalidá y lastrando la so capacidá de crecedera", esplica María Menéndez.

    N'Asturies disponemos de 451.317 hectárees de superficie forestal arbolada, de les cualos 80.560 hectárees son de mases de castañal de monte baxu. Esto supon un 17,85 % de la superficie arbolada d'Asturies y un 49,5 % de la superficie total nacional de castañal. La especie tuvo dende siempres un estrechu venceyu cola hestoria y la cultura asturianes al sirvir como material en construcciones como horros o barganales pa les finques. La castañal xugó amás un papel destacáu na dieta de la población rural mientres décades.

    Equipu d'investigación:

    • Pedro Álvarez Álvarez (Grupu d'Investigación en Sistemes Forestales Atlánticos (GIS Forest)
    • Marcos Barrio Anta (Grupu d'Investigación en Sistemes Forestales Atlánticos (GIS Forest)
    • Elena Canga Líbano (CETEMAS)
    • Juan Majada Guijo (CETEMAS, Grupu d'Investigación en Sistemes Forestales Atlánticos (GIS Forest)
    • María Menéndez Miguélez (CETEMAS, Grupu d'Investigación en Sistemes Forestales Atlánticos (GIS Forest)

    Imaxes:


Buscar