Noticias

  • Investigadores de la Universidá prueben l'ADN ambiental como técnica pa controlar les especies marines invasores

    05 de Febreru 2015

    La secuenciación masiva dexa resolver ambigüedaes a la d'identificar organismos que sobreviven na agua de llastre de los buques en llargues travesíes

    Alumnos y profesores a bordu del buque alemán Polarstern mientres la espedición que los llevó dende Bremen hasta Ciudá del Cabu en 2012.

    Un equipu d'internacional d'investigadores, coordinaos pola catedrática de Xenética de la Universidá d'Uviéu, Eva García Vázquez, foi pioneru al aplicar una técnica de secuenciación masiva d'ADN medioambiental pa poder controlar les especies marines invasores que viaxen na agua de llastre de los grandes buques. La prestixosa revista Marine Pollution Bulletin publica les resultancies del estudiu realizáu colos datos percanciaos nuna travesía dende'l puertu de Bremen n'Alemaña hasta Ciudá del Cabu en Suráfrica.

    Los trabayos, enmarcaos dientro de les llínees d'investigación del Observatoriu Marín d'Asturies ya impulsaos dende'l Cluster d'Enerxía, Mediu Ambiente y Cambéu Climáticu del Campus d'Excelencia Internacional, desenvolviéronse nel buque alemán d'investigación Polarstern. Alumnos y profesores del Máster Erasmus Mundus en Biodiversidad Marina y Caltenimientu participaron na travesía d'alredor d'un mes de duración.

    L'equipu tomó diariamente amueses de l'agua de carga del Polarstern, un buque rompehielos alemán dedicáu a la investigación, pa poder dir monitorizando los organismos que sobrevivíen col pasu de los díes y cuálos aguantaben a los cambeos de temperatura, osíxenu, etc. L'agua de llastre que los grandes cargueros utilicen pa garantizar la so estabilidá ye, anguaño, la vía más rápida de dispersión d'organismos marinos yá que la tomen nun puertu y suéltenla nun destín con una biodiversidá marina totalmente distinta.

    La estracción d'ADN y la secuenciación masiva de toles amueses realizose con tecnoloxía d'última xeneración nos llaboratorios de los servicios científicu-técnicos de la Universidá d'Uviéu. Tol material recoyío refundió miles de secuencies d'ADN, que los sos analises taxonómicos desenvolviéronse teniendo en cuenta dos marcadores xenéticos: unu p'animales y otru pa plantes, algues nesti casu. Les resultancies comparáronse colos datos llograos por aciu de identificación taxonómica de visu, al microscopiu, llevada a cabu a bordu.

    La revista Marine Pollution Bulletin publica'l trabayu d'un equipu internacional, lideráu pola catedrática Eva García Vázquez na Universidá d'Uviéu y la doctora Anastasija Zaiko na Universidá de Klaipeda (Lituania), pa testar una nueva técnica qu'ayude a apangar les invasiones biolóxiques

    Esta técnica pionera dexa ganar tiempu a la de realizar los controles de la biodiversidá marina yá que resulta más axilosa que'l recuentu visual de toles amueses. La secuenciación del ADN ambiental estena amás ciertes ambigüedaes a la d'identificar a los distintos individuos y, ello ye que dexó alcontrar dellos organismos que nun se pudieron reconocer nel recuentu visual.

    La distancia y variedá de les rutes que realicen los grandes cargueros que lleven nes sos bodegues enagües de llastre dexa a los cientos d'especies viaxar dende'l so hábitat orixinal hasta llugares con una biodiversidá bien distinta. Les travesíes suelen ser llargues y les condiciones de temperatura, cantidá d'osíxenu, etc., varien drásticamente polo que solo sobreviven especies altamente resistentes, que'l so potencial invasor nel destín ye altu.

    Nel casu de la ruta siguida pol Polarstern ente Bremen y Ciudá del Cabu la temperatura de l'agua de llastre algamó los 30 graos centígrados al altor del Ecuador, y l'osíxenu menguó drásticamente. Los protozóos y ciertos hongos, dientro de los animales, y delles algues coloraes anque en menor proporción, demostraron ser les especies con una mayor capacidá de supervivencia nuna travesía que los llevó dende les agües del Mar del Norte hasta la llínea del Ecuador, territorios con una biodiversidá marina bien distinta.

    La identificación d'estes especies supon un primer pasu esencial pa llograr un meyor control de la biodiversidá marina y frenar les invasiones biolóxiques qu'agora suponen unu de los principales problemes medioambientales de los océanos. L'artículu que se publica agora ye'l primeru d'una serie d'investigaciones.

    Equipu d'investigación

    Desenvuelven esta llínea d'investigación pola Universidá d'Uviéu:

    • Eva García Vázquez, Yaisel Borrel, Alba Ardura (Departamentu de Bioloxía Funcional)
    • José Luis Martínez Fernández (Servicios Científicu-Técnicos)
    • Daniel Serna Fuente (Servicios Científicu-Técnicos)

    Pola Universidá de Klaipeda (Lituania) y Cawthron Institute (Nueva Zelanda): Anastasija Zaiko

    Pola Universidá de Klaipeda: Aurelija Samuiloviene

    Amás nesti trabayu participaron Julia Schmidt-Petersen (Universidá de Gante, Bélxica) y Deni Ribicic (Norwegian University of Science and Technology, Noruega).

    Imaxe banner de portada

    Vista del buque rompehielos alemán Polarstern dedicáu a investigación. Semeya: Anastasija Zaiko

    Imaxes:


Buscar