Noticias

  • Investigadores de la Universidá ellaboren perfiles xeolóxicos pa un parque eólicu en Petra y una llínea de metro n'Istambul

    29 de Xineru 2015

    El grupu de Xeoloxía Aplicada a la Inxeniería, dirixíu pol profesor Daniel Arias, tamién trabaya na modelización de xacimientu de Riotinto n'Huelva, que va retomar l'actividá

    D'esquierda a derecha, Luis Alberto Pando, Daniel Arias, Carlos López, Luis María Díaz, Iker Martínez y César Castañón.

    Xordania, Turquía y Huelva son trés de los destinos nos qu'agora mesmu trabayen los miembros del grupu d'investigación de Xeoloxía Aplicada a la Inxeniería de la Universidá d'Uviéu. L'equipu, lideráu pol profesor Daniel Arias, foi contratáu pa desenvolver los trabayos de modelización xeolóxica pa la construcción d'un parque eólicu nes cercaníes de la ciudá xordana de Petra y tamién pa la construcción d'una nueva llínea de metro n'Istambul. Los xeólogos ya inxenieros tán rematando amás los estudios de cubicación del xacimientu de Riotinto n'Huelva, que dientro d'unos meses tien previstu retomar l'actividá minera.

    La empresa d'inxeniería Idom contrató los servicios del equipu d'espertos de la Universidá d'Uviéu pa la supervisión de trabayos xeolóxicos y xeotécnicos de la construcción d'un parque eólicu a tres kilómetro de Petra en Xordania. L'equipu d'investigadores realizó'l siguimientu de los sondeos y ellaboró los modelos xeolóxicos necesarios pa poder llevantar con seguridá los molinos de vientu. Ta previstu que los trabayos rematen el próximu mes de mayu.

    El segundu de los proyectos que se lleva a cabu cola empresa Idom ye la realización de los modelos xeolóxicos necesarios pa construyir una nueva llínea de metro n'Istambul que va xunir el llamáu Cuernu d'Oru de la mítica ciudá turca col aeropuertu. El primer tramu del trazáu, que los sos estudios yá tán desenvolviendo los xeólogos ya inxenieros de la Universidá d'Uviéu, mide 17 kilómetros y va travesar el cascu históricu d'Istambul.

    "Tratase d'un proyectu complexu porque atopamos con un sosuelu complicáu", esplica Daniel Arias. "En realidá, el terrén paezse enforma a Asturies porque na zona norte atopamos suelu carboníferu como'l que tenemos equí y más al sur zones de terciariu que seríen suelos más nuevos paecíos por casu al sosuelu de Xixón", señala'l xeólogu. La esistencia de materiales bien blandos en contactu con otros de gran durez fai necesariu trazar un perfil xeolóxicu bien afináu que dexe un diseñu fayadizu de les tuneladores que van furar los túneles, yá que se fai imposible realizar voladures.

    L'analís de caracterización de los materiales va llevase a cabu tamién nos llaboratorios de los servicios científicu-técnicos de la Universidá d'Uviéu. Nun ye la primer vegada que'l grupu de Xeoloxía Aplicada a la Inxeniería trabaya nun proyectu similar, dende fai más d'un añu desenvuelven los modelos xeolóxicos d'una de les llínees de metro que va travesar en centru históricu de Riad, n'Arabia Saudina.

    Per otru llau, l'equipu d'investigación ta rematando los estudios de cubicación del míticu xacimientu de Riotinto n'Huelva, qu'en pocos meses va retomar l'actividá pa estrayer ente 150 y 200 millones de tonelaes de cobre nuna esplotación a cielu abiertu. Gracies al software desenvueltu pol profesor César Castañón, los investigadores pueden evaluar d'una manera bien esacta non solo la cantidá de mineral esistente y el so allugamientu, sinón tamién les posibilidáes óptimes d'esplotación del mesmu. Les mesmes ferramientes tán aplicándose na evaluación de los recursos minerales d'Angola de la mano d'otres empreses d'inxeniería.

    Equipu d'investigación

    • Daniel Arias, profesor del departamentu de Xeoloxía
    • Carlos López Fernández, profesor del departamentu de Xeoloxía
    • Luis Alberto Pando González, profesor del departamentu de Xeoloxía
    • César Castañón Fernández, profesor del departamentu d'Esplotación y Prospección de Mines
    • Álvaro Rubio Ordóñez, profesor del departamentu de Xeoloxía
    • Luis María Díaz Díaz, becariu del departamentu de Xeoloxía
    • Iker Martínez, becariu del departamentu de Xeoloxía
    • Claudia Prada, becaria del departamentu de Xeoloxía

    Imaxe del banner de portada

    Sondeos realizaos nes cercaníes de Petra pa la construcción d'un parque eólicu.

     

    Imaxes:


Buscar