Noticias

  • Investigadores de la Universidá d'Uviéu y el IEO describen, per primer vegada a nivel mundial, l'afayu d'un híbridu fértil de cetáceu

    17 de Ochobre 2013

    Les pruebes xenétiques realizaes nel Departamentu de Bioloxía Funcional constataron el primer casu conocíu d'hibridación vidable ente especies de calderones y, de la mesma, el primeru y únicu documentado ente especies de cetáceos

    Un grupu de calderones nadando cerca la mariña.

    Un trabayu realizáu en collaboración ente científicos del Departamentu de Xenética de la Universidá d'Uviéu y del Proyectu de Mamíferos Marinos del Institutu Español d'Oceanografía (IEO), con participación de colegues de delles organizaciones, describe per primer vegada a nivel mundial la esistencia d'un híbridu vidable (post- F1) ente calderones comunes y calderones tropicales.

    Les resultancies del estudiu, publicaos apocayá na prestixosa revista PLOS One, formen parte de la tesis de Laura Miralles, investigadora del departamentu de Bioloxía Funcional de la Universidá d'Uviéu. Cola collaboración del Institutu Español d'Oceanografía, l'equipu d'investigación asturianu realizó l'estudiu xenéticu d'amueses tomaes n'animales d'esta especie varaos en distintos puntos del planeta (Isles Feroe, Galicia y Canaries).

    Amás, Laura Miralles completó una estancia internacional d'investigación nel Centre de Recherches Insulaires et Observatoire de l'Environnement (CRIOBE) en Polinesia Francesa p'ampliar el númberu d'amueses de la investigación y siguir col trabayu.

    Los científicos traten de determinar agora l'orixe de la hibridación ente dambes especies de calderones y delimitar el so localización xeográfica.

    Los calderones son cetáceos de tamañu mediu relativamente frecuentes nes nueses mariñes. Acéptase la esistencia de dos especies: el calderón común, típicu de les agües fríes del norte d'Europa y el calderón tropical que, como'l so nome indica, frecuenta agües más templaes del norte d'África. Sicasí, nes mariñes españoles apaecen individuos de les dos especies. La superposición parcial de les árees de distribución, la semeyanza ente les dos especies y la dificultá pa identificar la especie en ciertos casos basándose namá nes característiques morfométricas, fixo abarruntar la posible esistencia de dalgún fenómenu d'hibridación ente les dos especies.

    Les técniques d'analís xenéticu dexaron l'axudicación inequívoca de la especie nos individuos estudiaos. Amás confirmaron la esistencia d'un individuu híbridu adultu, frutu del encruz ente un calderón común y un individuu híbridu fértil, que la so madre yera un calderón común y el padre unu tropical. Esta ye la primer vegada que se describe genéticamente la esistencia d'un híbridu vidable ente estes dos especies y, tamién la primer vegada, ente especies de cetáceos.

    La investigación de Laura Miralles sigue alantre pa lleer la so tesis a lo llargo del próximu añu. La segunda parte del trabayu centrase n'intentar esplicar l'orixe de la hibridación ente dambes especies y la so localización xeográfica. La tesis de Laura Miralles, dirixida pola catedrática de Genética Eva García Vázquez y financiada pol programa Severo Ochoa del Principáu d'Asturies, va encetar de manera integral la especiación nel mediu marín sol títulu Papel de les barreres biogeográficas y hestoria evolutiva na estructura poblacional actual d'especies marines cosmopolites.

    Firmantes del artículu:

    Laura Miralles

    Santiago Lens

    Antonio Rodríguez-Folgar

    Manuel Carrillo

    Vidal Martín

    Bjarni Mikkelsen

    Eva Garcia Vázquez

    Imaxes:

    Enllaces Rellacionaos:


Buscar