Noticias

  • Investigadores de la Universidá d'Uviéu van rastrexar los alérxenos más comunes nes llambionaes de mayor consumu

    11 de Xineru 2013

    Fundación Mapfre concedió una de les sos 45 ayudes pa proyectos d'investigación na área de salú, al equipu de Xenética de Recursos Naturales de la Universidá d'Uviéu

    Investigadores de la Universidá d'Uviéu van rastrexar los alérxenos potenciales que contienen dalgunes de les llambionaes más consumíes n'España. L'equipu d'investigación de Xenética de Recursos Naturales de la Universidá d'Uviéu, dirixíu pola catedrática Eva García Vázquez, llogró una de les 45 ayudes que Fundación Mapfre concedió'l pasáu mes d'avientu a proyectos d'investigación en materia de salú, tantu nacionales como internacionales.

    Distintos estudios constaten que les alerxes alimentarias son un problema creciente n'España, tantu en neños como n'adultos. La composición de delles de les llambionaes de consumu más común ente neños y adultos inclúi ingredientes que pueden actuar como desencadenantes d'una alerxa alimentaria.

    Les llambiotaes vendíes a granel nun especifiquen en nenguna etiqueta los sos ingredientes, una y bones la lexislación vixente nun la esixe, por ello'l consumidor final nun puede saber si eses llambionaes contienen traces de dalgún de los alérxenos más comunes como los frutos secos, ciertes proteínes conteníes na gelatina, o animales, como la cochinilla, un pequenu insectu del que se llogra la carmina p'apurrir el color coloráu a los dulces.

    El investigadores van tomar amueses de distintos productos (gominolas, nubes de malvariscu, toffees o llambionaes complexes) en distintos puntos de vienta y van someter a un analís d'ADN nel llaboratoriu. Les resultancies van dexar determinar el nivel y la frecuencia de los principales alérxenos neses llambiotaes. Les resultancies del proyectu van formar parte de la tesis doctoral d'una de les nueves investigadores del grupu, Marta Muñoz Colmenero.

    Les conclusiones llograes a la fin de la investigación pretenden apurrir información pa reforzar el control y prevenir incidencies sanitaries asociaes al consumu inalvertíu d'alérxenos en llambionaes comerciales.


Buscar