Noticias

  • Investigadores de la Universidá d'Uviéu diseñen el portal de datos del proyectu The Web Index

    05 de Avientu 2013

    Tim Berners-Llee presentó va unos díes del segundu ranking que trata de midir l'impactu de la web nel mundu

    D'esquierda a derecha na imaxe, Gabe Trodd, Dillon Mann, Pantelis Koutroumpis, Karin Alexander, Bright Simons, Lily Cole, Jimmy Walles, Anne Jellema, Tim Berners-Llee, Hania Farham, Jose Emilio Llabra Gayo y Amen Grewal. / SEMEYA: The Web Foundation

    Investigadores de la Universidá d'Uviéu tomaron parte nel diseñu del segundu ranking The Web Index, ellaboráu dende la World Wide Web Foundation, que foi presentáu va unos díes por Tim Berners-Llee en Reinu Uníu. El profesor José Emilio Llabra allegó a la presentación del portal nel que los miembros del so equipu d'investigación WESO desenvolvieron el tratamientu de datos.

    Llabra y el so equipu remanaron toos el indicadores percanciaos polos espertos n'estadística pa combinalos  y da-yos un tratamientu que siga les directrices de la llamada web semántica, aquélla que la so información puede ser procesada y comparada non yá polos seres humanos, sinón tamién poles máquines. El desenvolvimientu y perfeccionamiento d'esti tipu de portales ye unu de los retos nos que trabayen inxenieros de too el planeta.

    The Web Index trata d'analizar factores económicos, políticos y sociales que pudieren variar por causa de la presencia d'Internet en cada país. Per un sitiu mídese l'usu, el porcentaxe d'usuarios d'Internet en cada país y el conteníu disponible pa ellos. Tamién se mide la infraestructura de comunicaciones, censura política, impactu na sociedá y otres variables que pueden ayudar a entender meyor la realidá en cada zona. 

    España baxó del puestu 18 nel que s'atopaba en 2012 al 28, que lo asitia per debaxo d'Israel, Grecia y Chile. Los datos amuesen l'impactu de la crisis financiera y de los retayos económicu y social, que tuvieron consecuencies na penetración y práctiques online. 


Buscar