Noticias

  • Investigadores de la Universidá d'Uviéu describen el debalu de los bárabos de perceba nel Cantábricu

    13 de Payares 2013

    Les conclusiones del trabayu, realizáu en collaboración col Centru d'Esperimentación Pesquera del Principáu d'Asturies, tienen implicación directa sobre la xestión y caltenimientu de la especie.

    D'esquierda a derecha, Ricardo González, José Luis Acuña y Antonella Rivera n'unu de los llaboratorios de la Universidá.

    Investigadores de la Universidá d'Uviéu y el Centru d'Esperimentación Pesquera del Principáu d'Asturies llograron describir, nun artículu publicáu nel últimu númberu de la prestixosa revista PLOS ONE, l'efectu que les corrientes marines tienen sobre los bárabos de perceba na mariña cantábrica. Tratase del primer trabayu qu'esplica cómo afecta l'afloramientu costeru, un sistema de corrientes marines, al desenvolvimientu y supervivencia de los bárabos del preciáu crustáceu. Les conclusiones tienen una implicación sobre la xestión y caltenimientu de la especie.

    La investigación desenvolvióse como parte de la tesis de Antonella Rivera y foi dirixida pol profesor José Luis Acuña dientro del Departamentu de Bioloxía d'Organismos y Sistemes de la Universidá d'Uviéu. La investigación foi financiada polos proyectos COSTAS (Ministeriu d'Educación y Ciencia), DOSMARES (Ministeriu de Ciencia ya Innovación) y FRENTES, al traviés de FICYT.

    L'estudiu, publicáu pola prestixosa revista PLOS ONE nel so últimu númberu, desvela l'efectu de les corrientes marines sobre les críes del preciáu crustáceu

    Mientres dos años el investigadores tomaron referencies y datos gracies a un correntímetru instaláu na redoma del puertu de Cuideiru. La consulta de pruebes xenétiques realizaes por otros equipos a exemplares recoyíos en distintos puntos de la mariña y l'estudiu de les series de vientos rexistraes na Axencia Estatal de Meteoroloxía (AEMET) dexaron a los científicos constatar desplazamientos de decenes de kilómetros de los bárabos de perceba dende'l llugar nel que nacen hasta'l puntu en que los recueyen los mariscadores. L'estudiu publicáu en PLOS ONE confirmó que l'afloramientu costeru, un sistema de corrientes qu'arriquez la mariña con agües fríes y cargaes de nutrientes, xuega un papel clave nesi procesu.

    El misteriosu viaxe de los percebes

    Los percebes tienen un periodu mediu de desenvolvimientu que ronda los cuatro años. Pasen la fase inicial del so ciclu de vida en forma de bárabos que, al contrariu que los adultos, llexen llibremente ente les agües. Mientres ésta fase crítica, les corrientes tresporten a los bárabos a otros llugares distintos d'onde nacieron. Pero los detalles d'ésti viaxe permanecen arrodiaos de misteriu. ¿A qué distancies mueven los bárabos mientres ésti procesu de dispersión? ¿Tratase d'una dispersión en toles direcciones o hai dalguna dirección preferente? ¿Cuántos bárabos piérdense nel océanu ensin poder tornar a les roques de la mariña?

    L'estudiu publicáu na revista PLOS ONE amuesa'l papel clave que xuega l'afloramientu costeru na dispersión y supervivencia de los bárabos de perceba. L'afloramientu ye un sistema de corrientes que lleva hasta la mariña y a la superficie capes más fondes y fríes d'agua, que son bien riques en nutrientes. Nel Cantábricu, esti fenómenu asocede cuando sopla'l nordeste pel branu, xusto nel periodu en que los percebes reprodúcense y emiten los bárabos.

    Los datos percanciaos na redoma del puertu de Cuideiru dexaron a los investigadores demostrar que los bárabos son tresportaos decenes de kilómetros escontra l'oeste mientres un añu normal d'afloramientu, pero namá unos pocos kilómetros escontra l'este mientres un añu ensin afloramientu.

    El investigadores consultaron los analises de la paecencia xenética realizaos ente percebes recoyíos en distintos puntos de la mariña confirma esta asimetría nel movimientu de los bárabos y la dependencia que les poblaciones tienen del apurra de xenes provenientes de zones asitiaes más al este. Amás, los cálculos de corrientes indiquen que, n'ausencia d'afloramientu, la mayor parte de los bárabos de perceba piérdense nel mar abiertu. Sicasí, los datos confirmen que si nun determináu branu sopla'l nordeste de forma consistente y l'afloramientu ye activu, cuatro año dempués van prindase más percebes de lo habitual.

    Implicaciones pa la xestión de la especie

    Les resultancies de la investigación tienen implicación directa sobre la xestión y caltenimientu de la especie. Per un sitiu, dexen esplicar y predicir les fluctuaciones na producción de percebes. Per otra parte, indiquen que la forma de xestionar los percebes nuna determinada zona puede afectar a árees asitiaes más al oeste, debíu al tresporte larvariu que provoca l'afloramientu.

    La campaña d'estracción de perceba n'Asturies establez que el pescadores de cada área de xestión esploten con exclusividad la so zona, en cuenta de un compromisu na coxestión del recursu. Amás de respetar vedes y cupos, esti compromisu obliga a el mariscadores a caltener un detalláu rexistru de les captures, que tien un gran valor científicu. Nos sos cerca de 20 años d'antigüedá, esti sistema de xestión dexó la esplotación sostenible d'esta especie nel Principáu.

    Firmantes del artículu

    Antonella Rivera

    Nicolás Weidberg

    Antonio F. Pardiñas

    Ricardo González-Gil

    Lucía García Flórez

    José Luis Acuña

    Semeya portada

    Mariscadores asturianos recoyendo percebes nel mar Cantábricu. SEMEYA: ANTONELLA RIVERA.

    Imaxes:


Buscar