Noticias

  • Investigadores de la Universidá d'Uviéu collaboren na ellaboración de The Web Index, el proyectu de Tim Berners-Llee pa midir l'impactu de la web

    10 de Setiembre 2012

    El ránking, impulsáu por Premiu Príncipe d'Asturies d'Investigación, trata de cuantificar cómo repercute la web na economía, la sociedá y el desenvolvimientu d'un país

    Páxina del proyectu The Web Index

    Investigadores de la Universidá d'Uviéu participaron nel proyectu The Web Index, qu'esta selmana presentaba en Londres el Premiu Príncipe d'Asturies d'Investigación Tim Berners-Llee, unu de los padres d'Internet. El proyectu tien como oxetivu midir l'impactu de la web nel nuesu planeta.

    Dende'l Departamentu d'Informática de la Universidá d'Uviéu'l grupu d'investigación WESO, lideráu polos profesores José Emilio Labra Gayo y José María Álvarez, contribuyóse nel desenvolvimientu del proyectu modelando y publicando tolos datos estadísticos percanciaos. L'equipu d'investigadores asturianos siguió les directrices que faen fácilmente aplicables y accesibles los datos per parte de terceros. Tola información percanciada en The Web Index ta disposición de los usuarios, pero tamién ta pensada pal consumu automáticu, un campu nel que la participación del equipu de la Universidá d'Uviéu foi especialmente significativa.

    The Web Index trata d'analizar factores económicos, políticos y sociales que pudieren variar por causa de la presencia d'Internet en cada país. Per un sitiu mídese l'usu, el porcentaxe d'usuarios d'Internet en cada país y el conteníu disponible pa ellos. Tamién se mide la infraestructura de comunicaciones, censura política, impactu na sociedá y otres variables que pueden ayudar a entender meyor la realidá en cada zona.

    Los investigadores collaboradores en The Web Index percanciaron un total de 85 indicadores pa indexar, cada unu d'ellos con un pesu específicu dientro de la ponderación final. Dalgunos d'esos datos fueron creaos pola Web Foundation y otros fueron arrexuntaos n'organizaciones internacionales como la ONU, ITU, World Blank, etc.

    L'índiz clasifica 61 países del mundu según una variedá de factores, tanto cuantitativos como cualitativos. Según les resultancies del analís, Suecia, EEXX y Gran Bretaña lideren la llista, ente qu'España ocupa'l puestu 18 de la llista. Nos últimos trés puestos figuren Burkina Faso, Zimbabue y Yemen.

    Enllaces Rellacionaos:


Buscar