Noticias

  • Investigadores de la universidá d'Uviéu analicen l'ADN de les merluces que se comercialicen n'España

    10 de Marzu 2011

    El Journal of Agricultural and Food Chemistry publica les resultancies d'esti estudiu científicu

    Un equipu d'investigadores de la Universidá d'Uviéu, en collaboración con un grupu de científicos griegos de la Universidá Aristóteles de Tesalónica, analizó l'ADN de les merluces que se comercialicen n'España y Grecia pa determinar la trazabilidad d'esti pexe, y concluyó que cerca del 40% de les etiquetes qu'indiquen el nome científicu de la especie o el so orixe xeográficu nun lu faen correchamente.

    El investigadores realizaron dos estudios de mercáu, el primeru ente los años 2004 y 2006 y el segundu en 2010. En dambes ocasiones analizaron paquetes de merluza fresca y de distintes marques de conxelaos en distintos hipermecados. Nel primer estudiu detectóse un 31,5% de llotes mal etiquetaos y nel segundu l'índiz d'etiquetáu erróneu algamó'l 38,9%.

    Según esplica Eva García Vázquez, catedrática de Bioloxía Funcional de la Universidá d'Uviéu y coautora del estudiu, estos erros podríen debese a equivocaciones o tracamundios mientres el procesu de distribución, pero lo interesao ye que se toparon "merluces africanes, más barates, qu'apaecíen etiquetaes como europees o americanes, xeneralmente más cares, y l'erru nun se producía a la inversa", lo que paez indicar que se tán cometiendo irregularidaes nel comerciu d'estos productos.

    La profesora García Vázquez manifestóse bien satisfecha pola publicación del trabayu d'esti grupu investigador y, al respective de la trescendencia social de la investigación, espera qu'ésta sirva por que se apliquen más ferramientes de trazabilidad de los productos d'alimentación y un mayor control de rutina nos mercaos, pa evitar que se produzan estes situaciones.


Buscar