Noticias

  • Investigadores de la Universidá apliquen la electrónica molecular a la meyora d'ordenadores y smartphones

    16 de Setiembre 2014

    El diseñu de interruptores moleculares con grafeno dexaría ameyorar la rapidez de los dispositivos y amenorgar el so tamañu

    Víctor Manuel García y Jaime Ferrer nel Campus de Llamaquique.

    Llograr ordenadores y smartphones más pequenos y eficientes. Ésti ye unu de los retos que se plantega la electrónica molecular, unu de los campos de vanguardia na investigación nanotecnolóxica. Investigadores de la Universidá d'Uviéu trabayen nel diseñu de interruptores moleculares que dexen ameyorar la rapidez de los dispositivos electrónicos y tamién amenorgar el so tamañu gracies a la interacción de determinaes molécules col grafeno.

    El proyectu Diseñu y Modelización de Nuevos Dispositivos Nanoelectrónicos ta financiáu pol Ministeriu d'Economía y Competitividá. L'equipu lideráu pol catedráticu Jaime Ferrer nel Departamentu de Física de la Universidá d'Uviéu trabaya nel desenvolvimientu teóricu de interruptores y otros dispositivos moleculares basaos en filos de grafeno en llugar d'oru.

    Los interruptores moleculares aspiren a reemplazar a los transistores como componentes básicos d'ordenadores y smartphones, ente otros dispositivos. El desenvolvimientu de la electrónica molecular apenes ta dando los sos primeros pasos y los espertos esperen que nel mediu plazu pueda revolucionar la eficiencia de los dispositivos informáticos. El reemplazu de los transistores (que la so base ye'l siliciu) por interruptores moleculares (con filos de grafeno) va dexar aumentar la rapidez de los preseos.

    Un interruptor molecular ta formáu por una molécula asitiada ente dos filos d'un material conductor. La so posición y reacción dexen o non el pasu de la eletricidá con mayor o menor fluidez. Los investigadores trabayen pa tratar d'esplicar y perfeccionar esi procesu nun interruptor con filos de grafeno. "Hasta agora la mayoría de interruptores diseñáronse con filos d'oru, pero tratase d'un material poco estable que xenera demasiáu ruiu al pasu de la eletricidá en sistemes d'electrónica molecular. El grafeno ye un material más robusto y fiable y por eso pensamos que pue ser un conductor muncho más estable", esplica Víctor García, unu de los físicos del equipu investigador.

    El grupu lideráu pol catedráticu Jaime Ferrer trabaya con universidaes ingleses y holandeses n'unu de los campos pioneros de la nanotecnoloxía

    Los espertos de la Universidá d'Uviéu trabayen en desenvolvimientos teóricos d'estos dispositivos y collaboren con grupos de la Universidá de Liverpool (Reinu Uníu), la Universidá Tecnolóxica de Delf (Holanda), la Universidá de Lancaster (Reinu Uníu) y l'Universidá de Zaragoza. Químicos, físicos ya inxenieros apurren un enfoque multidisciplinar al ambiciosu proyectu de diseñar dispositivos nanotecnolóxicos más eficaces. El trabayu de los investigadores asturianos sigue una llínea pionera d'investigación y yá foi publicáu na prestixosa revista Physical Review.

    Equipu investigador:

    • Jaime Ferrer Rodríguez
    • Víctor Manuel García Suárez
    • Rubén Rodríguez Ferradás
    • Diego Carrascal Camino

    Imaxe de portada

    Figura d'un enllaz molecular con grafeno. Diseñu: Víctor Manuel García

    Enllaces Rellacionaos:


Buscar