Noticias

  • Investigadores de la Escuela Politécnica de Mieres cuantifiquen el CO2 que pueden absorber les diez especies más comunes de los montes atlánticos

    26 de Setiembre 2013

    Inxenieros de Montes de la Universidá d'Uviéu estudien la influencia de los montes asturianos y gallegos a la d'apangar el cambéu climáticu

    Inxenieros de Montes de la Universidá d'Uviéu estudien la influencia de los montes asturianos y gallegos a la d'apangar el cambéu climáticu

    Un equipu d'investigadores de la Universidá d'Uviéu ellaboró modelos matemáticos que dexen determinar cuánto dióxidu de carbonu pueden absorber les diez especies más comunes nos montes atlánticos. Les conclusiones del trabayu, desenvueltu por Javier Castaño, Pedro Álvarez y Marcos Barrio, acabense de publicar na prestixosa publicación International Forestry Review y dexen a los especialistes establecer unes pautes pa llograr una xestión forestal más eficiente y meyor planiada.

    El trabayu lleváu a cabu dende'l Grupu d'Investigación de Sistemes Forestales Atlánticos –GIS Forest- (Departamentu de Bioloxía d'Organismos y Sistemes) en collaboración cola Unidá Mista d'Investigación en Biodiversidá del CSIC foi frutu d'un importante llabor de campu nos montes d'Asturies y Galicia mientres años. Los investigadores llograron establecer modelos matemáticos que, en función de distintos factores, pueden calcular cuántu CO2 absuerbe una masa forestal d'una determinada especie.

    L'artículu arrexunta les fórmules aplicables a les diez especies más comunes nel noroeste peninsular. Dalgunes d'elles, que s'ellaboraren con anterioridá, fueron reaxustaes y otres hanse calculáu per primer vegada, como nel casu de la castañal (Castanea sativa), abeduriu celtibéricu (Betula pubescens), faya (Fagus sylvatica) y tres especies del xéneru Quercus (Quercus petraea, Q. pyrenaica y Q. robur).

    Pa poder calcular cuánto dióxidu de carbonu absuerbe caúna de les especies, los modelos tienen en cuenta les condiciones ambientales en que se topen los árboles, la densidá del arboláu esistente, la rexeneración qu'esistió na zona o los tratamientos selvícolas aplicaos o plantegaos. Los niveles d'absorción d'una mesma especie pueden variar en función d'estes variables.

    Les grandes mases forestales d'Asturies y Galicia actúen como importantes sumidorios de dióxidu de carbonu que pueden influyir de manera notable a la d'apangar los efectos del cambéu climáticu.

    El Grupu d'Investigación de Sistemes Forestales Atlánticos (GIS-Forest), que dirixe'l doctor Pedro Álvarez, constató que les especies de crecedera rápida, como por casu los ocalitos, pueden actuar como soluciones rápides en casos como cultivos enerxéticos que precisen producir biomasa con rapidez; actuando tamién como eficaces sumidorios de CO2 al curtiu plazu. Sicasí, les especies de crecedera lenta como'l carbayu o la faya, entá teniendo tases de crecedera más baxes, constitúin reservorios mientres más tiempu, polo que son preferibles naquelles condiciones ambientales menos fayadices pa les de crecedera rápida.

    Los modelos ellaboraos y les conclusiones alcanzaes nel trabayu faciliten la planificación y xestión de les grandes mases forestales del noroeste yá que tamién establecen el nivel de producción de biomasa de les especies más comunes. Esos datos resulten claves pa tomar de decisiones como definir les llabores silvícolas necesaries en cada zona o determinar qué especie ye más fayadiza pa repoblar una área concreta del monte.

    Firmantes del artículu

    Javier Castaño-Santamaría

    Marcos Barrio-Anta

    Pedro Álvarez-Álvarez

    Imaxes:


Buscar