Noticias

  • Más de 130 estudiantes empecipien los cursos cero' de los graos billingües de la Universidá d'Uviéu

    01 de Setiembre 2011

    La mayor parte de los itinerarios que s'ufierten per primer vegada esti cursu yá tienen les places completes.

    La Universidá d'Uviéu empecipió güei los cursos cero' de los itinerarios billingües que van empezar a impartise esti cursu académicu por iniciativa del Campus d'Excelencia Internacional. 134 mozos matriculáronse nestos cursos preparatorios pa los estudiantes que'l próximu 12 de setiembre empiecen unu de los diez graos qu'ufierta formación n'inglés. La demanda superó en demasía les previsiones de la institución académica asturiana y, a pocos díes de que remate'l plazu de matrícula en centros universitarios, les places previstes pa itinerarios billingües tán casi completes magar entá queden vacantes en determinaos estudios.

    Los cursos cero' dieron empiezu na Escuela Politécnica Cimera d'Inxeniería de Xixón, con 50 alumnos; na Facultá de Comerciu, Turismu y Ciencies Sociales Xovellanos, con 20 estudiantes; la Escuela d'Inxeniería Informática (Uviéu), con 14 matriculaos; y la Facultá d'Economía y Empresa, con otros 50 estudiantes.

    Estos cursos preparatorios enceten conteníos léxicu-semánticos, sintácticos, pragmáticos y fonolóxicos y, en cada casu, va faese especial fincapié na terminoloxía propia de les disciplines que depués se vaigan a cursar nes sos respectives carreres. La duración de los cursos cero' ye de 20 hores lectives.

    Tantu na Escuela Politécnica de Xixón como na Facultá d'Economía les solicitúes pa los itinerarios billingües superaron la ufierta de places, polo que los centros van escoyer a los estudiantes con meyores espedientes. El númberu máximu d'alumnos per grupu ye de 25.

    Los Itinerarios Billingües, que s'imparten per primer vegada na Universidá d'Uviéu tres una esperiencia piloto'l pasáu cursu, ufierten a los estudiantes la oportunidá d'estudiar n'inglés una parte importante de les asignatures de les sos titulaciones y/o de realizar una movilidá a una universidá estranxera onde puedan siguir el so aprendizaxe nesti idioma. L'estudiante tendrá de completar un mínimu de 120 creitos ECTS n'asignatures que se van impartir n'inglés.

    Los graos qu'ufierten itinerarios billingües son:

    • Grau n'Alministración y Dirección d'Empreses (Facultá d'Economía y Empresa)
    • Grau n'Inxeniería Mecánica (Escuela Politécnica d'Inxeniería de Xixón)
    • Grau n'Inxeniería Eléctrica (Escuela Politécnica d'Inxeniería de Xixón)Grau n'Inxeniería Electrónica Industrial y Automática (Escuela Politécnica d'Inxeniería de Xixón)
    • Grau n'Economía (Facultá d'Economía y Empresa)
    • Grau en Contabilidá y Finances (Facultá d'Economía y Empresa)
    • Grau en Comerciu y Marketing (Facultá de Comerciu, Turismu y Ciencies Sociales "Xovellanos" de Xixón)
    • Grau en Turismu (Facultá de Comerciu, Turismu y Ciencies Sociales "Xovellanos" de Xixón)
    • Grau n'Inxeniería Química Industrial (Escuela Politécnica d'Inxeniería de Xixón)
    • Grau n'Inxeniería Informática del Software (Escuela d'Inxeniería Informática d'Uviéu)

    Enllaces Rellacionaos:


Buscar