Noticias

  • Inxenieros informáticos de la Universidá d'Uviéu incorporen la voz como vía d'accesu a los campus virtuales

    20 de Payares 2013

    El sistema dexa utilizar les plataformes de e-learning dende un teléfonu móvil a cencielles falando

    Estudiantes internacionales usando un dispositivu móvil

    Investigadores de la Universidá d'Uviéu desenvolvieron un sistema qu'incorpora una nueva canal d'accesu a les plataformes de e-learning convencionales: la voz. Entrar nel campus virtual al traviés del móvil ensin necesidá d'un tecláu o ameyorar l'accesibilidá de los discapacitaos visuales a esti tipu de plataformes son dalgunes de les aplicaciones directes del sistema diseñáu pol equipu d'investigación PULSO (Pervasive and Ubiquitous Learning and Semantics Uviéu), lideráu polos profesores del Departamentu de Informática Juan Ramón Pérez Pérez y Puerto Paule Ruiz.

    Na actualidá nenguna de les principales plataformes d'aprendizaxe on line incorpora la posibilidá de que los usuarios apuerten al traviés de la voz. El prototipu desenvueltu dende la Escuela d'Inxeniería Informática dexaría a los estudiantes aportar al so perfil del campus virtual al traviés del móvil en cualquier momentu y utilizando la voz pa poder consultar información como les sos notes, l'axenda d'eventos o les xeres pendientes.

    El nuevu desenvolvimientu, que facilita l'aprendizaxe on line a los discapacitaos visuales, recibió'l galardón al meyor trabayu presentáu dientro del prestixosu alcuentru internacional ITiCSE 2013

    "L'alumnu gana n'accesibilidá porque nun tien por qué tar ante un ordenador pa entrar y utilizar el campus virtual y eso déxa-y aprovechar tiempos muertos y desplazamientos", esplica'l profesor Juan Ramón Pérez. La tesis del profesor Víctor Álvarez, codirigida por Puerto Paule y Marcus Matthäus Specht (Open University of Nederland n'Holanda), foi'l puntu de partida de la idea d'incorporar la voz como una canal d'accesu más a les redolaes d'aprendizaxe virtual.

    El trabayu desenvueltu pol equipu PULSO foi reconocíu'l pasáu branu como'l la meyor ponencia presentada en ITiCSE 2013 (Annual Conference on Innovation and Technology in Computer Science Education), celebráu na Universidá de Kent nel Reinu Uníu. ITiCSE ye unu de los congresos de referencia internacional nel campu de la enseñanza de la informática. Esta investigación ta dientro del proyectu nacional Improving Performance and Robustness of Dynamic Languages to develop Efficient, Scalable and Reliable Software, dirixíu pol profesor Francisco Ortín Soler del Departamentu d'Informática.

    Monitorizar l'aprendizaxe

    Pa dir un pasu más allá, los inxenieros asturianos plantegaron un enfoque multidisciplinar del proyectu que dexe "monitorizar el patrón de comportamientu de cada alumnu nel so procesu d'aprendizaxe que sigue nun campus virtual", esplica Juan Ramón Pérez. Asina, los inxenieros informáticos tán collaborando con el profesores Carlos Núñez y Rebeca Cerezo, de la área de Psicoloxía evolutiva y de la Educación de la Universidá d'Uviéu pa desenvolver una serie d'indicadores que dexen que los estudiantes sían conscientes del so propiu procesu d'aprendizaxe nel sistema, ufiertándo-yos feedback en tiempu real p'asina poder modificar les sos pautes d'aprendizaxe.

    Autores de la ponencia

    • María Puerto Paule Ruiz
    • Víctor Manuel Álvarez García
    • Juan Ramón Pérez Pérez

    Imaxes:

    Vídeos Rellacionaos:


Buscar