Noticias

  • El Ministeriu d'Educación destaca'l "fuerte impactu rexonal" del Campus d'Excelencia Internacional Asturies-Ad Futurum

    26 de Xunetu 2011

    L'Informe de Siguimientu ellaboráu por un equipu d'auditores valora positivamente les acciones entamaes y señala que "la imaxe de la Universidá na redolada territorial y, especialmente nes empreses, ameyoró de manera considerable con motivu del CEI. Nesti sentíu cabo falar d'un ciertu descubrimientu"

    El rector y la vicerrectora del CEI, mientres la presentación del informe de siguimientu
    El Campus d'Excelencia Internacional de la Universidá d'Uviéu superó satisfactoriamente la primer evaluación de resultancies. L'informe de Siguimientu ellaboráu pol comité evaluador de los Campus d'Excelencia Internacional (CEI) del Ministeriu d'Educación valora positivamente les acciones entamaes y destaca "el fuerte impactu rexonal" del proyectu Asturies-Ad Futurum y el respaldu recibíu pola sociedá. "Cabo falar d'un ciertu descubrimientu", rellata l'informe en referencia a la meyora de la imaxe de la institución académica na redolada territorial.

    El rector de la Universidá, Vicente Gotor, y la vicerrectora del Campus d'Excelencia Internacional, Mª Paz Suárez Rendueles, presentaron les principales conclusiones de la evaluación realizada por espertos independientes y representantes del Ministeriu d'Educación y del Gobiernu rexonal tres la so visita a la institución académica'l 7 y 8 de xunu.

    Vicente Gotor manifestó l'enorme "prestu" poles resultancies llograos nesti primer informe, que destaca la implicación de la Universidá nel territoriu, les polítiques de internacionalización, el procesu de fusión de centros, l'adaptación al EEES nun tiempu récord, y el nuevu xiru que se dio a los másteres universitarios, ente otros munchos aspeutos.

    El Ministeriu d'Educación abrió'l pasáu mes de marzu un procedimientu d'evaluación de los proyectos escoyíos en 2009 na Convocatoria de Campus d'Excelencia Internacional. L'equipu d'auditoría realizó mientres dos díes visites a los campus d'Uviéu, Xixón y Mieres p'analizar sobre'l terrén les actuaciones del Campus d'Excelencia Internacional y celebró más d'una trentena d'entrevistes con profesores, investigadores, decanos y directores de centros, responsables de servicios, alministradores de campus, coordinadores de másteres, xerentes de los clusters, amás del equipu rectoral.

    Como resultancia, l'informe de siguimientu fai una valoración positiva nos distintos ámbitos d'actuación del CEI. D'entrada, l'informe indica que'l proyectu de Campus d'Excelencia Internacional Asturies-Ad Futurum "avanza de forma fayadiza". Considérase, añede'l documentu, "que les actuaciones y esfuerzos realizaos confirmen, con fechos, l'altu interés ya importancia otorgáu al proyectu CEI-Asturies, y manifestáu de forma repitida, pola comunidá universitaria, los axentes sociales y económicos participantes, según poles instituciones locales y autonómiques. Tamién se comprobó un altu esfuerzu de lideralgu per parte del equipu de gobiernu de la Universidá d'Uviéu".

    La vicerrectora del Campus d'Excelencia Internacional destacó qu'informe alude al CEI-Asturies como "un exemplu claru del fuerte impactu "rexonal‟ qu'una iniciativa d'esti tipu puede producir". L'equipu d'auditoría señala "que la imaxe de la Universidá na redolada territorial y, especialmente nes empreses, ameyoró de manera considerable con motivu del CEI. Nesti sentíu cabo falar d'un ciertu descubrimientu".

    'Acertada fusión de centros'


    El documentu defende como acertada y alliniada colos oxetivos del CEI la reorganización y fusión de centros, yá que incide na optimización de los recursos humanu y material. Tamién valora de forma positiva la redefinición de la ufierta d'estudios nun tiempu récord aprovechando la reforma en graos afechos al Espaciu Européu d'Educación Cimera (EEES) y considera "bien plantegáu y desenvueltu" el plan de fomentu del billingüismu empecipiáu en dellos centros. Mª Paz Suárez Rendueles recordó que pal próximu cursu ta prevista la implantación d'itinerarios billingües en diez grados.

    La puesta en marcha del Centru Internacional de Posgráu (CIP) y les iniciatives de internacionalización, como los Erasmus Mundus y los posgraos n'inglés o conxuntos con universidaes estranxeres, son otros de los aspeutos destacaos na evaluación. Tocantes a los Erasmus Mundus, la Unión Europea acaba d'aprobar dos programes nos que la Universidá d'Uviéu ye coordinadora, amás d'anovar otru de los que s'imparte dende va cinco años.

    Nel ámbitu de la investigación, l'informe considera "bien favorable" la iniciativa d'identificar 5 llínees d'investigación prioritaries dientro de cada cluster: Enerxía, Medioambiente y Cambéu Climáticu (CEMACC), y Biomedicina y Salú. Tamién define como "bien interesante y estratéxica" l'acción rellacionada cola Plataforma Off-Shore, non yá pal CEMACC sinón pa tol proyectu CEI-Asturies.

    N'infraestructures, los evaluadores destaquen l'actuación urbana realizada nel Campus d'El Cristu, dientro de los denominaos espacios sociales d'aprendizaxe. Finalmente, tocantes a la gobernanza, l'informe cree fayadiza y eficiente la estructura organizativa en redol a un Vicerrectorado de Campus d'Excelencia Internacional.

    Nel apartáu de suxerencies, los evaluadores apuesten por potenciar les actuaciones de captación de talentu. Nesta llínea, la vicerrectora anunció que nos próximos díes van salir una convocatoria pa incorporar investigadores d'excelencia y beques amestaes a los másteres pa captar a los meyores alumnos.

    Articular polítiques por que los clusters puedan exercer un efectu tractor n'otres árees de conocencia, potenciar que el investigadores espublicen el CEI nes publicaciones especializaes y nos congresos, y reforzar la comunicación interna cola comunidá universitaria son dalgunos de los puntos sobre los que l'informe aconseya incidir.

    Amás, los evaluadores animen a la Universidá a "avanzar nes acciones empuestes escontra la futura see conxunta de la Facultá de Medicina y l'Hospital Universitariu d'Uviéu". El rector señaló que la opinión de el auditores ye una "importante llombarada" pal treslláu de Medicina a La Cadellada, una propuesta incluyida dende'l primer momentu nel proyectu Ad Futurum.

    Esti informe de siguimientu va sirvir de base pa la valoración que va realizar la Comisión Internacional de Campus d'Excelencia Internacional el 20 y 21 d'ochobre. Les universidaes que llograron el sellu d'excelencia en 2009 tendrán de realizar una presentación de les sos resultancies na mañana del 20 d'ochobre en Madrid.

Buscar