Noticias

  • Inauguración del X Foru d'Empléu de la Universidá d'Uviéu: alcuentru de los estudiantes col mundu llaboral

    05 de Abril 2011

    El rector destaca l'afitamientu del certame na so décima edición y les sos posibilidaes como puerta a un primer empléu.

    Inauguración oficial del certame
    Medría del númberu d'empreses ya instituciones participantes, magar la crisis, y muncha espectación ente los acabante de titular y estudiantes d'últimos cursos, con ganes d'encarar el complicáu retu de consiguir trabayu. El X Foru d'Empléu abrió les sos puertes pa facilitar, dende la Universidá, esi difícil saltu.

    La inauguración oficial cuntó cola presencia del rector, Vicente Gotor, el conseyeru d'Industria y Empléu del Principáu, Graciano Torre, el conceyal de Coordinación Alministrativa y Facienda de Xixón, Santiago Martínez Argüelles, el presidente de la Federación Asturiana d'Empresarios, Severino García Vigón y el director de Banca d'Empreses de Cajastur, Ignacio Muñiz Rodríguez.

    Prácticamente toos coincidieron na necesidá de fomentar l'espíritu entamador ente los mozos y aprovechar tamién les posibilidaes qu'ufierten les nueves tecnoloxíes como ponte ente titulaos y empreses. El rector destacó'l papel que tuvo'l Foru nestos diez años y animó a los estudiantes a participar nesti certame que puede convertise nuna puerta al so primer empléu.

    La economista Pilar Jericó foi la encargada de la conferencia d'apertura, titulada "Atrévite a ser protagonista del to propiu futuru". Dende les 10 de la mañana, espositores de distintes empreses participantes atienden a mozos y moces qu'alleguen al Foru y apurren los sos currículos, con vistes a eventuales procesos de selección de personal.

    Amás d'esa actividá d'alcuentru ente estudiantes y empreses, mañana miércoles celebrarán dos meses redondes de los clusters del Campus d'Excelencia Internacional y una tercera dedicada a la integración llaboral de persones con discapacidá. Amás, a les 17:00 hores, va desenvolvese'l VII Alcuentru de Directivos que sol epígrafe "Los desafíos de la nueva economía", va cuntar como conferenciante col exministro d'Alministraciones Públiques, Jordi Sevilla.

    Imaxes:

    Enllaces Rellacionaos:


Buscar