Noticias

  • Graduación de los alumnos del Programa de Mayores de la Universidá d'Uviéu

    26 de Xunu 2012

    Los 44 estudiantes recibieron los sos diplomes nun actu nel Paraninfu

    Semeya del actu de graduación de PUMUO.

    El Paraninfu del Edificiu Históricu acoyó la entrega de diplomes a los 44 alumnos del Programa Universitariu pa Mayores de la Universidá d'Uviéu (PUMUO) qu'anguaño superaron el tercer y el quintu cursu. El rector de la Universidá d'Uviéu, Vicente Gotor, presidió la graduación, acompañáu pola conseyera de Bienestar Social y Vivienda del Principáu d'Asturies, Esther Díaz, y el director xeneral de Caxa Rural, Fernando Martínez Rodríguez, en representación de la entidá bancaria que collabora nel desenvolvimientu de PUMUO.

    El rector, Vicente Gotor, felicitó a los graduaos polos sos diplomes "y por demostrar que siempres se ye nuevu p'aprender y que la edá nun ye una torga". Gotor manifestó'l so prestu col funcionamientu del programa y les sos resultancies y avanzó qu'a los cursos que yá se desenvuelven n'Uviéu y Avilés, van sumase llueu los desenvueltos en Xixón.

    Pela so parte, la conseyera de Bienestar Social y Vivienda, Esther Díaz, amosó'l so compromisu d'intentar que los retayos presupuestarios nun comprometan el futuru de PUMUO en 2013 "porque los efectos positivos qu'esti programa tien ensin dulda son enforma mayores que l'aportación dineraria que se realiza". Nuna llínea bien asemeyada pronuncióse Fernando Martínez, quien recordó que Caxa Rural collabora con esti programa dende la so nacencia "pa devolver a los asturianos daqué de lo qu'ellos nos dan".

    Tamién los alumnos tomaron la palabra ante un Paraninfu apináu d'amigos y familiares y estimaron a los responsables les oportunidaes que PUMUO brínda-yos al tratase d'una iniciativa "que xune a munches persones evitando soledaes y murnies". Laudelino Villarmar estimó amás a la Universidá l'esfuerzu que realiza "por ayudar nos a esclariar qué queremos ser de mayores", concluyó ironizando.


Buscar