Noticias

  • Espertos universitarios evalúen los programes educativos de los museos españoles

    04 de Marzu 2015

    El proyectu ECPEME, lideráu dende la Universidá d'Uviéu, analiza les actividaes educatives desenvueltes por 14 centros espositivos de too el país.

    Taller con neños nel Muséu Xurásicu d'Asturies. Semeya: Recrea

    Un equipu d'espertos lideráu dende la Universidá d'Uviéu ellaboró la primer ferramienta pa evaluar de forma sistemática y dende una perspectiva cualitativa los programes educativos que desenvuelven los museos españoles. El proyectu d'investigación, lideráu pola profesora Roser Calaf, investigadora del Departamentu de Ciencies de la Educación, analizó les actividaes educatives llevaes a cabu por un total de 14 museos con un espectru de colecciones bien variáu. Investigadores, educadores patrimoniales, representantes de museos, estudiantes y docentes axuntense los díes 4 y 5 de marzu n'Uviéu nun Seminariu que va estudiar les conclusiones del proxecto Evaluación Cualitativa de Programes Educativos en Museos Españoles (ECPEME).

    L'equipu multidisciplinar conformáu por investigadores de cinco universidaes trazó una estratexa d'evaluación que toma los principales aspeutos de xestión, equipu humanu, metodoloxía y conteníos didácticos del programa. "Estudiemos museos de característiques bien distintes y una conclusión xeneral ye que toos tenemos de trabayar n'estrechar la complicidá esistente ente'l Muséu y l'Escuela", esplica Roser Calaf.

    La selección d'espacios espositivos estudiaos inclúi centros de patrimoniu históricu, artísticu, industrial o científicu, con distintos modelos de xestión. Ente los 14 museos tán dos asturianos, el Muséu Xurásicu d'Asturies y el Muséu del Ferrocarril de Xixón. Amás, fueron oxetu d'evaluación los programes del Muséu Thyssen-Bornemisza, Muséu Nacional d'Escultura de Valladolid, Muséu Patiu Herreriano de Valladolid, Muséu do Pobo Galego, Ekainberri, Museu d'Art Modern de Tarragona, Muséu de Caltayud, Muséu Cementu Rezola, Museu d'Historia de la Inmigració de Catalunya, Muséu d'Huelva y el Museu de Mínes-yos de Cerc.

    Los investigadores reparen la necesidá d'estrechar los venceyos coles escueles y crear equipos humanos estables dedicaos a la divulgación cultural.

    El trabayu de campu realizáu dexó confirmar l'importante pesu específicu que'l públicu escolar tien na nómina de visites de los espacios espositivos. Amás, la esistencia d'un equipu propio y estable dedicáu al desenvolvimientu de les acciones culturales en museos resulta clave pa llograr bones resultancies nesti campu, a los qu'una evaluación mista, esterna ya interna, puede contribuyir.

    Proxecto: Evaluación Cualitativa de Programes Educativos en Museos Españoles (ECPEME)

    Equipu d'investigación ECPEME:

    Roser Calaf (Universidá d'Uviéu), José Luis San Fabián (Universidá d'Uviéu), Miguel Suárez (Universidá d'Uviéu), Sué Gutiérrez (Universidá d'Uviéu), Mikel Asensio (Universidá Autónoma de Madrid), José María Cuenca (Universidá d'Huelva), Myriam Martín (Universidá d'Huelva), Alex Ibáñez (Universidá del País Vascu), Iratxe Gillate (Universidá del País Vascu) y Pilar Rivero (Universidá de Zaragoza).

    Artículos d'espardimientu científicu sobre ECPEME:

    SUÁREZ, M. Á.; CALAF, R. y SAN FABIÁN, J. L. (2014): "Aprender Hestoria al traviés del Patrimoniu. Los casos del Muséu del Ferrocarril d'Asturies y del Muséu de la Inmigración de Cataluña", en Revista d'Educación, n. 365, págs. 38-66.

    Ferramienta d'analís ellaborada ad hoc pa ECPEME:

    SUÁREZ, M.A., GUTIÉRREZ, S., CALAF, R., SAN FABÍAN, J.L. (2013). La evaluación de l'acción educativa museal: una ferramienta pal analís cualitativu. Clío 39.

    Imaxe banner portada

    Actividaes d'educación patrimonial con neños. Semeya: Recrea

    Imaxes:

    Enllaces Rellacionaos:


Buscar