Noticias

  • Espertos de la Universidá tracen una estratexa de futuru pal mediu rural asturianu

    19 de Marzu 2015

    L'estudiu, encargáu pol Gobiernu rexonal, recueye 135 acciones pa dinamizar y recuperar l'actividá del sector primariu

    L'informe plantega la necesidá d'ameyorar los servicios públicos nes zones rurales a partir de criterios comarcales coles mires de frenar el cayente demográficu.

    Un equipu d'espertos de la Universidá d'Uviéu acaba de presentar el documentu Estratexa de competitividá del sector primariu y desenvolvimientu del mediu rural asturianu, que recueye 135 acciones concretes pa dinamizar y recuperar l'actividá nesti sector. El profesor Felipe Fernández, investigador del Departamentu de Xeografía, lidera l'estudiu, encargáu pol Gobiernu rexonal, p'analizar l'actual coxuntura agrícola y ganadera y proponer midíes qu'aseguren el so futuru.

    El trabayu, desenvueltu a lo llargo de seis meses por un equipu multidisciplinar y ellaboráu en collaboración con empresarios, sindicatos, responsables del sector forestal o productores ecolóxicos, conclúi, ente otros encamientos, la simplificación alministrativa, llograr esplotaciones de mayor tamañu, recuperar pa camperes más de 40.000 hectárees ocupaes agora por carbes o ameyorar les canales de comercialización pa los productos.

    El proyectu foi presentáu nun actu públicu que cuntó cola intervención del presidente del Principáu, Javier Fernández, y la presencia de la conseyera de Agroganadería, María Jesús Álvarez, y el vicerrector d'Estensión Universitaria y Comunicación, Vicente Domínguez, ente otros.

    L'informe plantega la necesidá d'ameyorar los servicios públicos nes zones rurales a partir de criterios comarcales coles mires de frenar el cayente demográficu cuidao que, según Felipe Fernández, los equipamientos nun pueden ser "un privilexu urbanu".

    Nel ámbitu del sector forestal, el documentu plantega como oxetivu formar una comisión dientro del Conseyu Forestal qu'en tres años identifique y esllinde los montes pro indivisos y constituya les sos xuntes xestores, según definir oxetivos concretos de producción pa los cultivos silvícolas. La necesaria meyora de la competitividá rique, amás, aumentar el tamañu de les esplotaciones enzancáu por cuestiones como'l minifundismo, la falta de títulos de propiedá o la falta d'infraestructures.

    Los espertos encamienten, amás, encarar una simplificación de la burocracia a la que s'enfrenten llabradores y ganaderos a partir d'una meyor coordinación ente alministraciones.

    Títulu del estudiu: Estratexa de competitividá del sector primariu y desenvolvimientu del mediu rural asturianu

    Equipu d'investigación

    DIRECCIÓN:

    • Felipe Fernández García (catedráticu d'Analís Xeográficu Rexonal).

    EQUIPU:

    • Cristina Fernández Bustamante
    • José Antonio González Díaz
    • Daniel Herrera Arenas
    • David Olay Varillas

    Imaxes:

    Documentos Rellacionaos:


Buscar