Noticias

  • Estudiantes del Campus de Xixón compiten con una monoplaza eléctricu na Fórmula Student

    08 de Xunu 2016

    L'equipu asturianu va defender el so prototipu nos certames que se van desenvolver a finales d'agostu n'Italia y Barcelona

    Equipo autor del diseño del monoplaza.

    Cerca de 30 estudiantes de distintes inxenieríes del Campus de Xixón diseñaron una monoplaza eléctricu col que van competir per primer vegada na Fórmula Student, un concursu internacional qu'estrema los meyores proyectos nel campu de la automoción realizaos por universitarios. El diseñu asturianu, denomináu Formula EPI, foi presentáu esta mañana nel Aulariu Sur del campus xixonés.

    El modelu, una monoplaza eléctricu de dimensiones daqué más amenorgaes qu'una fórmula estándar, ye frutu d'un añu y mediu de trabayu del equipu d'estudiantes conocíu como ImpulsEracing Formula Student Team Xixón. Los alumnos realizaron yá'l diseñu, previu a la construcción, d'un prototipu non contaminante, con aerodinámica compensada y bona aceleración de cero a cien.

    El coche va presentase oficialmente nes competiciones de la Fórmula Student d'Italia y Barcelona a finales del mes d'agostu. Los estudiantes de la Universidá d'Uviéu, que participen per primer vegada na competición, van ser evaluaos en función de distintes pruebes estátiques y dinámiques qu'analicen aspeutos como'l diseñu, l'analís de costu, el plan de negocios, l'aceleración, resistencia o consumu del vehículu.

    La Fórmula Student ye la competición d'estudiantes d'universidaes más prestixosa del mundu nel campu de la automoción. El so oxetivu ye promover la excelencia n'inxeniería al traviés d'un concursu onde los miembros de cada equipu diseñen, constrúin, desenvuelven y prueben una monoplaza. La Fórmula Student ye amás l'escenariu ideal por que los estudiantes puedan esponer les sos conocencies ante les empreses más prestixoses del sector.

    El certame, qu'empezó a xestase en Houston en 1979, desenvuélvese anguaño en países como Alemaña, Italia, Reinu Uníu, Xapón, Brasil, o Australia, amás d'España. Los equipos participantes tienen d'asemeyar una situación real na cual una empresa de competición contrata a inxenieros pa desenvolver un prototipu. La monoplaza tien que superar pruebes d'aceleración, frenada, y estabilidá, amás d'ufiertar un caltenimientu fácil, baratu y fiable.

    Imaxes:

    Enllaces Rellacionaos:


Buscar