Noticias

  • Estudiantes de la Universidá d'Uviéu ganen un premiu nacional al meyor proyectu entamador

    26 de Mayu 2014

    Ainhoa Cid del Valle, Natalia Ferreira y Máximu Calvo recoyeron el galardón Uniproyecta, concedíu por Universia, nun actu celebráu en Alcalá de Henares

    Semeya de familia de los galardonaos colos premios Uniproyecta.

    Estudiantes de la Universidá d'Uviéu alzáronse col Premiu Uniproyecta qu'impulsen Universia y la Rede Universitaria d'Asuntos Estudiantiles (RUNAE), al traviés del so Grupu de Trabayu d'Empléu pa reconocer al meyor proyectu entamador universitariu d'excelencia.

    Ainhoa Cid del Valle, Natalia Ferreira Llosa y Máximu Calvo Ordás integren l'equipu d'alumnos de la Universidá d'Uviéu que vio reconocíu col premiu Portal Universia el so proyectu Karten. Una iniciativa empresarial que yá punxeron en marcha y  tien como oxetivu estrumir al máximu'l potencial de les técniques de Teledetección y los Sistemes d'Información Xeográfica (SIG), col fin d'ufiertar servicios como la ellaboración de mapes intelixentes a midida, l'analís xeográficu para tomar de decisiones de negociu, xestión d'infraestructures deportives, etc. Los impulsores de Karten trabayen agora nel desenvolvimientu del so propiu nanosatélite, col fin de consiguir imaxes propies pa la teledetección.

    El rector de la Universidá d'Uviéu, Vicente Gotor, foi l'encargáu d'apurrir el galardón al equipu ganador nel actu celebráu en Alcalá de Henares. Los trés estudiantes conformen un equipu multidisciplinar formáu por una inxeniera técnica en Topografía, una inxeniera forestal y un graduáu en Ciencies Ambientales. Toos ellos cursaron el máster universitariu en Teledetección y Sistemes d'Información Xeográfica. El so proyectu empresarial yá foi reconocíu va unes selmanes col segundu premiu del Concursu d'Idees Empresariales que promueve la Universidá d'Uviéu.

    El xuráu tamién estremó'l trabayu d'estudiantes de la Universidá de Zaragoza, quien se llevaron el premiu Fundación Universia gracies a un proyectu bautizáu como Airtronics. Finalmente, otorgóse una mención honorífica a la propuesta presentada por estudiantes de la Universidá de Cádiz, denominada  Merca Concursu.


Buscar