Noticias

  • Enrique Moreno asegura que'l mayor problema de la ciruxía pancreática ye'l diagnósticu tardíu

    17 de Febreru 2011

    El Premiu Príncipe d'Asturies ufiertó una conferencia dientro del ciclu entamáu pol Campus d'Excelencia Internacional.

    El doctor Moreno mientres la so intervención
    El ciruxanu y Premiu Príncipe d'Asturies d'Investigación Científica y Técnica Enrique Moreno esplicó los principales retos de la ciruxía pancreática na actualidá nuna conferencia de conteníu clínico dirixida a los profesionales y estudiantes de la Facultá de Medicina, dientro del ciclu entamáu pol Campus d'Excelencia Internacional.

    L'actu foi presidíu pol rector, Vicente Gotor, y el doctor Ignacio González-Pinto, xefe de la Unidá de Tresplante Hepáticu del Hospital Universitariu Central d'Asturies (HUCA) y profesor de Ciruxía y especialidaes médicu-quirúrxiques, foi l'encargáu de presentar a quien ta consideráu una de les máximes autoridaes mundiales en ciruxía y tresplantes. González-Pintu destacó de Moreno la so aguada como docente y la so capacidá de siguir anovando. Moreno indicó na so intervención qu'unu de los mayores problemes de la ciruxía pancreática ye que la mayor parte de los enfermos diagnostícase tarde. La clave, indicó, ta en tomar dellos síntomes qu'aparentemente nun tán xustificaos como un posible niciu d'una enfermedá pancreática.

    Xefe del Serviciu de Ciruxía Xeneral y Tresplantes Abdominales del Hospital 12 de Octubre de Madrid, repasó con detalle les pruebes y exames que se deben faer ante'l barruntu d'enfermedá, y los métodos a siguir pal so correctu diagnósticu. Enrique Moreno completó la so conferencia con una detallada esplicación d'una intervención quirúrxica. El Premiu Príncipe d'Asturies allegó a Uviéu pa participar nel Conseyu Asesor Internacional del Campus d'Excelencia de la institución académica asturiana.


Buscar