Noticias

  • La Universidá d'Uviéu celebra l'actu d'apertura del nuevu cursu académicu

    12 de Setiembre 2016

    El rector aboga por asitiar el financiamientu de la institución nos niveles previos a la crisis y anuncia la puesta en marcha d'un plan estratéxicu de meyora

    Acto de apertura del curso universitario.
    El rector de la Universidá d'Uviéu, Santiago García Granda, afirmó esta mañana mientres l'actu d'apertura del cursu académicu qu'el so equipu trabaya pa llograr una medría de los fondos, tanto públicos como privaos, qu'asitien el financiamientu de la institución académica nos niveles previos al entamu de la crisis económica. La máxima autoridá de la Universidá d'Uviéu realizó estes manifestaciones na Biblioteca del Edificiu Históricu, que sirvió d'escenariu pa la celebración del actu d'apertura del cursu 2016-2017. La ceremonia cuntó cola participación de cerca de 130 doctores revistíos, numberoses autoridaes polítiques y académiques y un ampliu abanicu de representantes de la sociedá asturiana.
     
    Santiago García Granda destaca nel balance de los sos primeros cien díes la creación de nueves places docentes, la implantación de dos másteres, la propuesta d'un sistema común d'almisión d'estudiantes o'l cambéu del reglamentu de permanencia
     
    La secretaria xeneral de la Universidá, Eva María Corderu González, abrió les intervenciones con una repasada a los principales datos del cursu anterior, que s'integren na memoria académica. El catedráticu de Fisioloxía Vexetal Ricardo Javier Ordás foi l'encargáu d'impartir la llección inaugural con una ponencia centrada sobre la intelixencia vexetal que llevaba por títulu La melena de Machín, un árbol con sentimientos.
     
    El rector de la Universidá d'Uviéu empezó la so intervención dando la bienvenida a los estudiantes, profesores ya investigadores y personal d'alministración y servicios que s'incorporen al nuevu cursu. Tuvo tamién un mensaxe d'agradecimientu escontra los universitarios xubilaos y escontra los que finaron apocayá, como'l catedráticu José Barluenga.
     
    Pasáu, futuru y Norte
     
    El so discursu institucional centróse nun doble enfoque: el pasáu, pero sobremanera, el futuru, cola mirada puesta nel Norte, al que Santiago García Granda refirióse cola espresión asturiana nortiando.
     
    El máximu responsable universitariu fixo balance de los principales llogros consiguíos mientres los primeros cien díes de xestión del nuevu equipu rectoral. Mentó, ente otros aspeutos, el desbloquéu de 13 places de profesores venceyaos, la creación de 44 places d'ayudante doctor, la implantación de los másteres n'Inxeniería de Caminos, Canales y Puertos y n'Analises de Datos pa la Intelixencia de Negocios o'l Grau n'Inxeniería Geomática.
     
    Refirióse tamién a la convocatoria de les beques de movilidá pa los contrataos Severu Ochoa, al cambéu de la estructura organizativa de los clusters pa dar cabida a toles árees de la conocencia o a les diverses midíes acometíes pa potenciar la proyección esterior de la Universidá.
     
    Citó igualmente'l rector la propuesta d'un sistema común d'almisión d'estudiantes pal cursu 2018-2019 alcordada apocayá pol Grupu 9 d'Universidaes o'l cambéu del reglamentu de permanencia, que da respuesta a la demanda estudiantil.
     
    Santiago García Granda destacó la constitución d'una comisión billateral con FADE pa encetar aspeutos claves como la empleabilidá, la formación, el emprendimiento, la innovación y l'investigación y anunció la creación de nueves cátedres financiaes por empreses y entidaes locales.
     
    Nel balance de los sos primeros cien díes, incluyó tamién la finalización de la fase analítica pa la ellaboración d'un plan estratéxicu que va tener tres eje básicos: meyora docente ya insertamientu profesional, meyora investigadora y de tresferencia y actualización tecnolóxica.
     
    Cola mirada puesta nel futuru, el rector recordó que la Universidá esperimentó nos últimos años un drásticu amenorgamientu presupuestariu y un empeoramientu nes condiciones llaborales y académiques. "Pensamos qu'esiste marxe pa intensificar l'esfuerzu inversor y de mecenalgu de la Universidá", destacó. Por tou ello, comprometióse col equipu que dirixe a trabayar de forma firme y proactiva pa llograr una medría de fondos, tanto públicos como privaos, "coles mires de recuperar y superar los niveles de financiamientu más altos llograos pola institución y el mayor impulsu de la nuesa investigación, tresferencia y estensión universitaria", sorrayó. Anunció'l rector la recuperación del Plan de Promoción de la Investigación en conexón colos programes del Plan de Ciencia, Tecnoloxía ya Innovación (PCTI) y de les iniciatives de conceyos, empreses y asociaciones.
     
    El rector terminó'l so discursu cola referencia al Norte qu'empunxo tola so intervención. "La nuesa brúxula tien de siguir mirando al Norte, anque sía mar por mediu. Pero hemos de saber que, amás del Norte magnéticu, Norte Xeográficu y Norte Lamber, hai otru bien importante: el nuesu Norte personal (…) y el del compromisu contraíu cola Universidá d'Uviéu", indicó.
     
    El presidente del Principáu, Javier Fernández , pela so parte, destacó'l papel de les instituciones na formación d'una ciudadanía activa, participativa y esixente, nel que la Universidá ta llamada a desempeñar un rol imprescindible". El xefe del Executivu autonómicu sorrayó qu'ente los deberes de el so Gobiernu inclúyese'l sofitu a la institución académica. Prometió Javier Fernández aprovechar al máximu los recursos pa cumplir lo alcordao nel marcu estable de financiamientu 2015-2018, suscritu ente dambes partes. "Nun vamos regatiar. De la nuesa parte, vamos poner tolos recursos disponibles", concluyó.
     
    L'actu d'apertura del cursu universitariu coincidió col entamu de les clases pa cerca de 21.000 estudiantes universitarios, según los datos provisionales de matrícula.
     

Buscar