Noticias

  • El proyectu Erasmus Mundus PUEDES va impulsar 120 movilidaes internacionales el próximu cursu

    15 de Mayu 2014

    El comité executivu del programa alderica acciones de fortalecimientu de relaciones en materia de docencia ya investigación ente los 20 socios europeos y llatinoamericanos

    Xunta del comité executivu del proyectu Erasmus Mundus PUEDES.

    El comité executivu del Erasmus Mundus  PUEDES axuntóse esta selmana na Universidá d'Uviéu pa empecipiar la selección de los 120 alumnos europeos y llatinoamericanos que'l próximu cursu van realizar una movilidá internacional gracies al proyectu lideráu pola institución asturiana. Amás, los socios aldericaron les posibilidaes d'estrechar collaboraciones en materia de docencia ya investigación ente la ventena d'universidaes participantes.

    El proyectu Erasmus Mundus PUEDES ye otra de les acciones estratéxiques llevaes a cabu col impulsu del Campus d'Excelencia Internacional pa fomentar la movilidá, la internacionalización y la captación de talentu na institución académica asturiana.

    A partir del 1 de setiembre alumnos de grau y posgráu, investigadores y personal d'alministración y serviciu van empezar les estancies internacionales subvencionaes col programa PUEDES (Participación Universitaria pa El Desenvolvimientu Económico y Social en Llatinoamérica). Tratar d'un proyectu Erasmus Mundus-Acción 2, financiáu pola Comisión Europea con 4 millones d'euros y coordináu pola Universidá d'Uviéu. 

    El proyectu ta integráu por un total de 20 socios nel que participen 6 universidaes europees, alcontraes n'Alemaña, Francia, Grecia, Italia, Polonia y Reinu Uníu, y 13 universidaes llatinoamericanes, asitiaes n'Arxentina, Bolivia, Brasil, Chile, Colombia, Ecuador, México, Paraguay y Perú. Les places d'intercambiu ufiertaes cubren tolos campos de conocencia pero priorícense aquellos consideraos como más relevantes, según distintos estudios, pal promover la contribución al desenvolvimientu social y económico de los terceros países participantes: Xestión y Alministración d'Empreses, Inxeniería y Tecnoloxía, Derechu, Ciencies Médiques y Ciencies Sociales.


Buscar