Noticias

  • El Programa Fulbright busca 'embaxadores' ente los estudiantes de la Universidá d'Uviéu

    23 de Ochobre 2014

    Representantes del programa educativu d'intercambiu, que llogró'l Premiu Príncipe d'Asturies de Cooperación Internacional, celebraron una sesión informativa na Escuela Politécnica d'Inxeniería de Xixón y una mesa redonda n'Uviéu

    El profesor José Muñiz presenta l'actu, con Guy Vanover a la so derecha y acompañáu por cuatro becarios Fulbright.

    El  prestixosu programa de beques Fulbright, premiáu col Príncipe d'Asturies de Cooperación Internacional 2014 pola so voluntá d'ameyorar la educación global de los mozos, foi protagonista en dos de los actos más allegaos enmarcaos na Selmana de los Premios na Universidá d'Uviéu. Dellos becarios fueron los protagonistes d'una sesión informativa empobinada a los estudiantes nel Aulariu Sur del Campus de Xixón. L'actu tuvo conducíu pol catedráticu de Psicometría de la Universidá d'Uviéu José Muñiz, quien esfrutó d'una beca Fulbright na Universidá de Massachusetts en 1987. Pal profesor Muñiz, "les beques Fulbright tienen un impactu inmensu na vida científica y personal de les persones y tamién un impactu institucional, pos dexen establecer unes relaciones ente universidaes que faciliten, por casu, la formación de postgraduados".

    En representación del programa participaron Guy Vanover, xefe del programa de beques pa españoles, y becarios recién d'España, Indonesia, Pakistán y Suráfrica, según un estadounidense becáu por Fulbright nel nuesu país. Toos ellos fueron recibíos a la so llegada al Campus pola vicerrectora de Internacionalización y Posgráu, Cuadonga Betegón, y pol director de la Escuela Politécnica d'Inxeniería de Xixón, Hilario López. Guy Vanover, que valoró nunos 50.000 euros la inversión que supon una beca Fulbright, fixo énfasis en que'l programa, "amás de tener méritu académicu, favorez l'entendimientu ente países". "Queremos embaxadores d'España n'Estaos Xuníos", dixo dirixiéndose a los estudiantes, "y que volváis con una visión real d'aquel país".

    Nun foi la única cita col programa Fulbright na Universidá d'Uviéu, onde dellos exbecarios, agora profesionales pertenecientes a distintos sectores falaron de la so esperiencia nuna mesa redonda celebrada nel Paraninfu de la Universidá d'Uviéu. El rector, Vicente Gotor, foi l'encargáu de dar la bienvenida a los participantes nun alcuentru moderáu pola periodista Montserrat Domínguez y que cuntó cola presencia de Harriet Fulbright, vilba del senador Fulbright. Tom Healy, miembru de la Comisión Fulbright; Gabriel Guerra Mondragón, embaxador d'Estaos Xuníos; l'economista Agustín Maravall; y la pianista Sylvia Torán fueron los encargaos de percorrer la hestoria d'esti programa de beques que tien na internacionalización la so principal misión.

    Imaxes:


Buscar