Noticias

  • El Ministeriu d'Industria estrema a la Universidá d'Uviéu como portal pioneru del dominiu ‘.es'

    01 de Xunetu 2014

    El ministru d'Industria, Enerxía y Turismu, José Manuel Soria, apurrió'l galardón al rector, Vicente Gotor. La institución académica asturiana foi una de los diez primeres en realizar el rexistru n'Internet

    El rector y el ministru d'Industria, xuntu col restu d'autoridaes, na entrega del premiu

    La Universidá d'Uviéu foi estremada como portal pioneru del dominiu ".es". El rector, Vicente Gotor, recoyó ayeri'l galardón en Madrid nun homenaxe ufiertáu a un centenar d'universidaes, instituciones públiques y empreses procedentes de toles comunidaes autónomes por ser pioneres nel rexistru de dominios d'Internet sol indicativu ‘.es', característicu del nuesu país y d'usu mayoritariu n'España.

    L'actu tuvo presidíu pol ministru d'Industria, Enerxía y Turismu, José Manuel Soria, y cuntó tamién cola presencia del secretariu d'Estáu de Telecomunicaciones y pa la Sociedá de la Información, Víctor Calvo Sotelo, y el director xeneral de Rede.es, César Miralles. El profesor Francisco Sánchez Martínez, director fundador del Institutu d'Astrofísica de Canaries, pronunció un discursu en nome de los galardonaos.

    La Universidá d'Uviéu foi la sesta institución en rexistrar "uniovi.es" como dominiu n'Internet y foi la única entidá asturiana distinguida con esti galardón del Ministeriu d'Industria. La entidá pública Rede.es analizó los primeres 200 dominios ".es" que se rexistraron. D'ellos, un total de 116 caltienen portales d'Internet entá operativos sol dominiu ".es".

    Toles comunidaes autónomes tán representaes, anque la mayor parte de los dominios son de Madrid (52). Sígenlu Catalunya (18), Andalucía (11), Euskadi (7), Galicia (6), Valencia (6), Canaries (4), Castiella y Llión (3), Aragón (1), Asturies (1), Balears (1), Cantabria (1), Castiella La Mancha (1), Estremadura (1), La Rioxa (1), Murcia (1) y Navarra (1).Mientres l'eventu, José Manuel Soria señaló que los dominios ‘.es' desenvolviéronse en paralelu a la evolución d'Internet y pasaron, nun tiempu récord, de constituyir un fenómenu minoritariu a formar parte de la rutina profesional y personal de los ciudadanos del país. El ministru, coles mesmes, describió los .es' como un espaciu n'Internet seguru y bien asitiáu, venceyáu al nuesu territoriu, la nuesa cultura y el nuesu idioma. Por eso, constituyéronse como los dominios favoritos de el españoles.

    Anque los dominios ".es" fueron fundaos en 1989, nun ye hasta 1990 cuando se produz el primer rexistru, www.nic.es., creáu pola mesma entidá xestora d'estos dominios d'Internet. Sicasí, el primer dominiu ayenu a esti organismu qu'entá permanez operativu ye www.iac.es, que foi solicitáu pol Institutu d'Astrofísica de Canaries en 1991. De siguío figuren www.ciemat.es (Centru d'Investigaciones Enerxétiques, Medioambientales y Tecnolóxiques), www.cedex.es (Centru d'Estudios d'Esperimentación y Obres Públiques), www.imim.es (Institutu Municipal d'Investigación Médica de Barcelona), www.unizar.es (Universidá de Zaragoza), www.uniovi.es (Universidá d'Uviéu), www.uv.es (Universidá de Valencia), www.upv.es (Universidá Politécnica de Valencia), www.upna.es (Universidá Pública de Navarra) y www.inia.es (Institutu Nacional d'Investigaciones agraries).

    Amás, ente los pioneros galardonaos apaecen empreses ya instituciones como Telefónica I+D, Mapfre, Anaya, Iberdrola, Seat, Indo, Danone, Real Academia Española, Institutu Cervantes, Biblioteca Nacional, Comisión Nacional del Mercáu de Valores, Institutu Español d'Oceanografía, Xunta de Galicia o Generalitat Valenciana, amás de la mayor parte de les universidaes públiques del país, ente otres.

    En 2009, el dominiu ".es" cumplió 20 años, con 1,2 millones de dominios rexistraos. Cinco año más tarde, nesti 2014, superen los 1,7 millones, 500.000 más que los ".com", y representen 1 de cada 2 dominios d'Internet de cuantos esisten nel nuesu país.


Buscar