Noticias

  • El IES Aramo d'Uviéu gana la primer edición del concursu educativu UNIGΣNIOS

    03 de Abril 2012

    Los equipos del IES Padre Feijoo de Xixón y el IES Valle d'Ayer de Moreda llograron el segundu y tercer puestu na competición sobre ciencia

    Equipu ganador de la primer edición de UNIGΣNIOS

    L'equipu del IES Aramo d'Uviéu fíxose esta mañana cola victoria na primer edición del concursu UNIGΣNIOS, una iniciativa entamada pola Oficina de Tresferencia de la Investigación de la Universidá d'Uviéu y patrocinada por FECYT y la Fundación La Caixa. La gran final del concursu apostóse esta mañana nel Edificiu Históricu, el IES Padre Feijoo de Xixón y el IES Valle d'Ayer de Moreda llograron el segundu y tercer puestu, ente que el IES Monte Naranco foi'l cuartu finalista.

    El rector de la Universidá d'Uviéu, Vicente Gotor, apurrió los premios a tolos participantes y animó-yos a persistir nel so interés pola ciencia pa completar una brillosa carrera nel mundu de la investigación.

    L'equipu ganador, compuestu por Francisco Fernández, Miguel Recio y Darío de la Fuente, recibió de manos del rector un iPad, ente que los segundos clasificaos lleváronse un IPod y los terceros un microscopiu.

    Los diez equipos participantes, formaos por alumnos de 1º de Bachilleratu, enfrentaron mientres dos díes distintes pruebes pa resolver cuestiones sobre Física, Química, Bioloxía, Matemátiques, Xeoloxía y Tecnoloxía. UNIGΣNIOS pretende averar l'actividá científica ya innovadora al traviés de formatos amenos y poniendo a prueba les sos conocencies al traviés mecanismos de xuegos clásicos como'l trivial, el tabú o'l roscu de la ciencia, una singular versión de Pasapalabra.

    Imaxes:


Buscar