Noticias

  • Ayudes estatales pa proyectos d'investigación

    04 de Ochobre 2013

    El Gobiernu publica les bases pa la concesión d'ayudes a proyectos d'investigación

    Na imaxe, una investigadora de la Universidá d'Uviéu.

    El Boletín Oficial del Estáu recoyó'l 2 d'ochobre les ordes poles que s'aprueben les bases reguladores pa la concesión, ente otres, d'ayudes a proyectos d'investigación dientro del Programa Estatal de Fomentu de la Investigación Científica y Técnica d'Excelencia y del Programa Estatal d'Investigación, Desenvolvimientu ya Innovación Empobinada a los Retos de la Sociedá, dambos nel marcu del Programa Estatal d'Investigación Científica y Técnica 2013-2016.

    El Ministeriu d'Economía y Competitividá empecipió asina los trámites necesarios pa la publicación de les correspondientes convocatories de proyectos. Como yá se vieno anunciando per parte del Ministeriu, la convocatoria de proyectos d'investigación fundamental non empobinada del anterior Plan Nacional d'Investigación Científica y Técnica 2008-2012, estrémase anguaño en dos convocatories: Proyectos d'I+D nel marcu del Subprograma Estatal de Xeneración de Conocencia, y Proyectos d'I+D+i "Reto Investigación", nel marcu del Programa Estatal d'I+D+i Empobinada a los Retos de la Sociedá.

    Como adelantu a la publicación de les convocatories, que'l Ministeriu espera producir a lo llargo d'esti mes d'ochobre, adelántrase una nota informativa coles principales novedaes y aspeutos destacaos. Na convocatoria del Subprograma Estatal de Xeneración de Conocencia van publicase tamién les actuaciones: Proyectos "Esquiza Ciencia" y "Esquiza Tecnoloxía", y Acciones de dinamización "Europa Excelencia". Coles mesmes, na convocatoria del Programa Estatal d'I+D+i Empobinada a los Retos de la Sociedá va faese pública tamién l'actuación "Iniciatives de programación conxunta internacional".

    Los oxetivos d'estes ayudes atópense recoyíos nel Plan d'Actuación Añal 2013 que ta disponible na páxina web del MINECO. Los plazos de presentación van indicar nes correspondientes convocatories.


Buscar