Noticias

  • El fotógrafu José Ferrero presenta ‘The elements' nel Centru Cultural LAUDEO

    28 de Febreru 2012

    La Universidá d'Uviéu acueye la primer esposición individual que l'artista cuelga n'Asturies dende fai 9 años.

    El fotógrafu José Ferrero

    Diba nueve años que'l fotógrafu avilesín José Ferrero nun colgaba n'Asturies una amuesa individual. La sala d'esposiciones del Centru Cultural LAUDEO (C/San Francisco, 1) acueye dende güei martes y hasta el 31 de marzu The elements, "un trabayu vivu y en progresu" qu'esibe la mirada del prestixosu fotógrafu asturianu sobre los elementos básicos que configuren la naturaleza.

    L'amuesa, entamada pol Vicerrectorado d'Estensión Universitaria, Cultura y Deportes, puede visitase nel Edificiu Históricu de manera gratuita n'horariu de 11 a 14.00 hores y de 17 a 20.30 hores de llunes a vienres y los sábados de 10 a 13.00 hores.

    Mientres l'actu d'inauguración celebráu esta mañana, Ferrero amosóse "encantáu" de volver esponer n'Asturies y estimó a la Universidá d'Uviéu'l so sofitu por que The elements vease tamién nel Principáu. L'artista almitió que la esposición inclúi instantánees "difíciles de ver y totalmente desprovistes de materia porque fuxí d'elementos espectaculares". Tratase de trabayos que pretenden "remembrar momentos y situaciones" al traviés d'elementos faltos d'identidá.

    El vicerrector d'Estensión Universitaria, Cultura y Deportes, Vicente Domínguez, amosóse bien satisfechu de que "un artista del prestíu de Ferrero esponga en LAUDEO". Domínguez aportunó nel compromisu de la Universidá pa sofitar y proxectar el trabayu de los artistes asturianos. "Dende Estensión Universitaria tratamos de faer una cultura de barricaes y de guerrilla p'averanos al públicu y demostrar que pueden faese coses bien interesantes ensin grandes presupuestos", esplicó.

    La Universidá d'Uviéu va editar un catálogu que va recoyer los trabayos de The Elements y el procesu de montaxe de la esposición.

    Imaxes:


Buscar