Noticias

  • El Conseyu de Gobiernu de la Universidá aprueba'l calendariu d'elecciones al claustru y el reglamentu de collaboración docente

    28 de Setiembre 2016

    El rector anuncia la negociación d'una nueva Relación de Puestos de Trabayu del personal funcionario

    El rector, Santiago García Granda, tras el Consejo de Gobierno
    El Conseyu de Gobiernu de la Universidá d'Uviéu aprobó güei el calendariu d'elecciones al claustru, un cambéu de la Relación de Puestos de Trabayu del personal llaboral y dellos reglamentos, ente ellos el que regula la concesión de la collaboración docente. Amás, el rector, Santiago García Granda, anunció tres la xunta que se va empecipiar de manera inmediata" la negociación d'una nueva RPT pal personal funcionario.
     
    El procesu p'anovar el claustru universitariu empecípiase mañana cola convocatoria oficial d'elecciones. El periodu pa presentar candidatures va tar abiertu ente'l 13 y el 19 de noviembre, y les votaciones celebrarán el 15 de noviembre. La primer xunta del nuevu claustru va tener llugar previsiblemente n'avientu.
     
    Polo que respecta al cambéu de la RPT llaboral, el rector indicó que solo afecta a ocho places vacantes naquellos servicios onde se precisa personal de forma urxente, fundamentalmente n'Informática, Servicios Científicu Técnicos (SCTs) y una plaza pa la supervisión de la instalación radiactiva de la Escuela d'Inxeniería de Mines, Enerxía y Materiales d'Uviéu.
     
    Sicasí, Santiago García Granda anunció que se va axustar una nueva Relación de Puestos de Trabayu de la plantiya de funcionarios que non solo va satisfaer los requerimientos de la sentencia del Tribunal Cimeru de Xusticia d'Asturies, sinón que se va afaer a la nueva estructura de gobiernu. La nueva RPT va escorrer, amás, "faer una distribución más uniforme de los puestos de trabayu basaos nes característiques reales de los puestos, que respuendan a les necesidaes y que les persones sían escoyíes en función de la so capacidá. Nós vamos axustar y nun vamos imponer una RPT", destacó.
     
    Ente los reglamentos que güei pasaron pol órganu universitariu, el rector destacó como "un finxu" la normativa sobre collaboración docente, que va dexar a trabayadores en proyectos y contratos d'investigación, becarios predoctorales o postdoctorales, y tamién al personal d'alministración y servicios collaborar na docencia, cola consiguiente reconocencia al so llabor. Esti reglamentu va entrar a valir una vegada publicáu nel Boletín Oficial del Principáu d'Asturies (BOPA) y va poder beneficiar a unos doscientos trabayadores de la Universidá.
     
    Los otros dos reglamentos aprobaos en Conseyu de Gobiernu faen referencia a los  Colexos Mayores y Residencies Universitaries, cola actualización de delles normes de funcionamientu internu, y a la comisión d'alministración electrónica. Esti postreru "bien importante", en palabres del rector, "acordies con les últimes disposiciones que nos obliguen a implementar l'alministración electrónica en tola Universidá".

Buscar