Noticias

  • El Campus d'Excelencia Internacional impulsa l'Observatoriu Marín d'Asturies

    24 de Xunu 2014

    El proyectu naz como una Agrupación Estratéxica de Grupos d'Investigación interdisciplinar, dedicada al estudiu de los ecosistemes marinos y mariñes de la mariña asturiana

    Observatoriu Marín d'Asturies

    El Campus d'Excelencia Internacional de la Universidá d'Uviéu pon en marcha l'Observatoriu Marín d'Asturies (OMA), una iniciativa que pretende impulsar la investigación rellacionada colos ecosistemes marinos y mariñes de la mariña asturiana. L'Observatoriu constitúyese como una Agrupación Estratéxica de Grupos d'Investigación na que participen grupos y equipos multidisciplinares de la Universidá d'Uviéu cola cuenta d'axuntar y facilitar la información sobre'l mar n'Asturies a la comunidá científica, a los ciudadanos, a los profesionales y a les alministraciones.

    Esa información va dexar la ellaboración d'estadístiques ya informes globales y específicos según el desenvolvimientu d'investigaciones, analises y proyecciones sobre'l mediu marín y mariña, constituyéndose nuna plataforma d'investigación, docencia observación, desenvolvimientu tecnolóxicu y tresferencia de resultancies.

    La Universidá d'Uviéu, al traviés d'esti proyectu, aspira a ser un puntu de referencia rexonal, nacional ya internacional de la observación y de la investigación rellacionada col mar. Ente les llínees que se van encetar destaca, por casu, el siguimientu y detección de cambeos nel mediu ambiente marino, la investigación sobre recursos marinos o'l desenvolvimientu de tecnoloxíes aplicaes a la observación del mar. Un portal web va dar accesu a les midíes ambientales y a los datos percanciaos polos equipos d'investigación, según a los trabayos científicos rellacionaos col Mar Cantábricu.

    El OMA va encetar, ente otres llínees, el siguimientu y detección de cambeos nel mediu ambiente marino y el desenvolvimientu de tecnoloxíes aplicaes a la observación del mar

    L'Observatoriu incorpora una serie d'equipamientos de la Universidá d'Uviéu dedicaos a la observación y a la investigación de los ecosistemes marinos y costeros, ente los que s'atopen equipos esistentes na Unidá de Muestreo Oceanográficu, una rede d'observación que'l so núcleu lu constituyen dos llexes oceanográfiques –financiaes col programa INNOCAMPUS— y diversos equipos del departamentu de Bioloxía d'Organismos y Sistemes, ente otros. Esta rede cunta con avanzaos sensores medioambientales, meteorolóxicos, físicos, químicos y biolóxicos y con una infraestructura de datos espaciales que dispon d'un geoportal con acceso web y visores p'amosar información georeferenciada.

    Esti proyectu va contribuyir, amás, a la internacionalización y a la integración nel territoriu de la Universidá d'Uviéu, al amontar la so presencia en redes y plataformes nacionales ya internacionales, ya implicar al texíu empresarial y social asturianu. Esta iniciativa enmarcase nel Cluster d'Enerxía, Medioambiente y Cambéu Climáticu de Ad Futurum y cunta col sofitu de Banco Santander, al traviés del recién conveniu suscritu ente la Universidá d'Uviéu y l'entidá bancaria.

    El OMA va cuntar col profesor José Luis Acuña, como director científicu, y va disponer tamién d'un Comité Científicu que va ser l'encargáu de proponer un Plan d'Actuación Añal.

    Los investigadores que se sumaron primeramente, colos sos grupos d'investigación al proyectu son:

    • Eva García Vázquez, departamentu de Bioloxía Funcional
    • Heather Stoll, departamentu de Xeoloxía
    • José Manuel Ricu Ordás, departamentu de Bioloxía d'Organismos y Sistemes
    • José Manuel Costa Fernández, departamentu de Química Física y Analítica
    • Fernando Las-Heras Andrés, departamentu d'Inxeniería Eléctrica, Electrónica, de Computadores y Sistemes
    • Consolación Fernández González, departamentu de Bioloxía d'Organismos y Sistemes
    • Julio Arrontes Junquera, departamentu de Bioloxía d'Organismos y Sistemes
    • María Gloria Blanco Blanco, departamentu de Bioloxía Funcional

Buscar