Noticias

  • Conveniu ente la Universidá y el Conceyu de Sotu'l Barcu pa financiar beques a estudiantes del conceyu

    21 de Abril 2014

    El conceyu destina 6.000 euros a ayudes al estudiu pa desaniciar l'actual coxuntura económica

    Jaime Menéndez Corrolades y Vicente Gotor tres la firma del conveniu nel Conceyu de Sotu'l Barcu.

    La Universidá d'Uviéu y el Conceyu de Sotu'l Barcu suscribieron esta mañana un conveniu de collaboración pa financiar beques de sofitu a estudiantes universitarios residentes nel conceyu. El Conceyu va destinar 6.000 euros a ayudes al estudiu pa desaniciar los efectos de l'actual coxuntura económica y completar la convocatoria estatal de beques, apocayá modificada pola política de beques del Ministeriu d'Educación, Cultura y Deportes.

    El conveniu foi robláu nel conceyu de Sotu'l Barcu pol rector de la Universidá, Vicente Gotor, y l'alcalde, Jaime Menéndez Corrolades, nun actu nel que tamién tuvo presente'l vicerrector d'Estudiantes, Luis Rodríguez Muñiz.

    La Universidá d'Uviéu va convocar estes ayudes destinaes a financiar el treslláu y material pa los estudiantes qu'anguaño tean matriculaos na Universidá d'Uviéu y que moren en Sotu'l Barcu. La convocatoria de les ayudes va salir publicada llueu nel BOPA y va ser efectiva mientres el presente curso académicu 2013-14. Anguaño, una trentena d'estudiantes procedentes d'esti conceyu cursen estudios na Universidá d'Uviéu y podríen beneficiase d'esta iniciativa del Conceyu.


Buscar