Noticias

  • La Universidá d'Uviéu estrecha llazos con Bolivia

    20 de Mayu 2011

    La institución académica firma un conveniu de collaboración cola Universidá Tomás Frías de Potosí

    Firma del alcuerdu de collaboración ente la Universidá d'Uviéu y l'Universidá 'Tomás Frías' De Potosí
    La Universidá d'Uviéu acaba de roblar un conveniu de collaboración cola Universidá Tomás Frías de Potosí (Bolivia) pol que dambes instituciones pretenden empecipiar trabayos conxuntos n'investigación y movilidá d'alumnos. El rectores de dambes instituciones, Vicente Gotor y Roberto Bohórquez, sellaron l'alcuerdu en presencia de la Delegación de la rexón de Potosí que visita estos díes Asturies.

    El rector de la Universidá d'Uviéu destacó la importancia d'esti conveniu marco, que supon ampliar los llazos d'unión con Iberoamérica, especialmente con Bolivia, un país onde la institución académica asturiana tien alcuerdos de collaboración institucional puntuales.

    Nesta mesma llínea, el so homólogu bolivianu, Roberto Bohórquez, amosó'l prestu d'empecipiar esta collaboración, que podría ser especialmente importante non yá pa la Universidá Tomás Frías sinón tamién pa la rexón en materia de desenvolvimientu de proyectos d'investigación

    La Universidá Autónoma 'Tomás Frías' de Potosí, ciudá minera asitiada a 4.000 metros d'altitú, ye similar en tamañu a la d'Uviéu, cuenta con 20.000 estudiantes y ufierta 44 titulaciones. La rexón, qu'acaba de suscribir un alcuerdu de hermanamiento con Asturies, tien una intensa actividá minera d'oru, estañu y chombu y cuenta con una de les mayores reserves mundiales de litiu

    A la firma del alcuerdu, nel despachu oficial del Rectoráu, asistieron tamién importantes personalidaes de la sociedá civil que formen parte de la delegación encabezada pola embaxadora de Bolivia n'España, Mª del Carmen Almendras; el Gobernador de Potosí, Félix González; l'alcalde de Betanzos, Esteban Llanos, y otros miembros de la embaxada. Per parte de la Universidá d'Uviéu tamién tuvieron presentes: la vicerrectora de Internacionalización y Cooperación al Desenvolvimientu, Ana María Fernández, y el director d'área pa Iberoamérica, Antolín Esteban Hernández. El conveniu va ser desenvueltu llueu n'alcuerdos específicos de collaboración.

    Imaxes:


Buscar