Noticias

  • Constituyíu'l Conseyu de Cooperación al Desarrollu de la Universidá d'Uviéu

    25 de Mayu 2011

    Ye l'órganu de sofitu y asesoramientu a les acciones y proyectos en materia de cooperación.

    Los distintos colectivos de la comunidá universitaria y les árees más rellacionaes col ámbitu de la cooperación tán representaos nel Conseyu de Cooperación al Desarrollu de la Universidá d'Uviéu. L'órganu constituyóse formalmente'l pasáu 19 de mayu, so la presidencia de la vicerrectora de Internacionalización y Cooperación al Desarrollu, Ana María Fernández.

    El Conseyu cunta amás con Antolín Esteban Hernández, director d'Área pa Iberoamérica, restu del Mundu y Cooperación al Desarrollu, como vicepresidente; Juana María González, xefa de Serviciu del Vicerrectorado de Internacionalización y Cooperación al Desarrollu, como secretaria; y trelce vocalías desempeñaes por representantes del PDI, PAS, alumnáu, según les grandes árees de conocencia con esperiencia nel ámbitu de la cooperación al desarrollu.

    Ente les sos funciones, el Conseyu va sofitar, va enriar y va informar les actividaes y proyectos de la Institución en materia de cooperación al desarrollu nos campos de la formación pal desarrollu, investigación, sensibilización, voluntariáu, asistencia técnica y cooperación interuniversitaria.

    Igualmente, va asesorar a los órganos de gobiernu de la Universidá en materia de cooperación pal desarrollu, va sofitar l'espardimientu y va dar siguimientu al cumplimientu del Códigu de Conducta de les Universidaes en materia de cooperación, va proponer el desenvolvimientu de programes d'acción y va informar sobre la so evolución y resultancies, va informar sobre les actividaes añales de cooperación al desarrollu, y va proponer comités técnicos pa la evaluación y l'asesoramientu de proyectos.

    Documentos Rellacionaos:


Buscar