Noticias

  • El Conseyu de Gobiernu de la Universidá aprueba la Cuenta Xeneral del exerciciu 2011

    28 de Xunu 2012

    La lliquidación de les cuentes del pasáu exerciciu caltien el mesmu remanente positivu del añu anterior

    El Rector de la Universidá d'Uviéu, Vicente Gotor, informó de los principales alcuerdos adoptaos na xunta del Conseyu de Gobiernu celebrada güei, ente los que, amás de la lliquidación de cuentes, destaca l'aprobación de la normativa xeneral pa la regulación de los trabayos de Fin de Grau nes distintes titulaciones.

    Unu de los principales alcuerdos foi l'aprobación de la Cuenta Xeneral de la Universidá d'Uviéu correspondiente al exerciciu 2011, que va ser alzada al Conseyu Social pa la so aprobación definitiva. La lliquidación de cuentes del pasáu añu refundia un remanente non afectáu positivu de 3,5 millones d'euros, una cifra similar a la del zarru del añu 2010.

    El Vicerrector de Planificación Económica, Convenios y Contratos, Santiago Álvarez, esplicó que'l saldu positivu nel exerciciu 2011 débese fundamentalmente "al fondu esfuerzu que se realizó na contención del gastu corriente". La política d'austeridá siguida na Universidá d'Uviéu dexó que la institución académica asturiana pudiera enfrentar tolos sos gastos nun momentu d'importantes restricciones, derivaes del amenorgamientu d'ingresos.

    "Afixímonos a la complicada situación económica y presupuestaria que travesamos. Qu'esista un remanente positivu nun significa que la Universidá cunte col financiamientu necesariu pa encarar tolos gastos que precisaría realizar; a cencielles, contuvimos de forma importante'l nuesu gastu p'afaenos", señaló'l responsable de Planificación Económica del equipu rectoral.

    El Conseyu de Gobiernu alcordó tamién nomar como presidente de la Xunta Electoral Central al nuevu decanu de Derechu, Benjamín Rivaya.


Buscar