Noticias

  • Manuel Menéndez agora axustes nel sector bancariu na conferencia inaugural de les Xornaes "Les reformes pendientes n'España"

    02 de Avientu 2011

    El Campus d'Excelencia Internacional entama esti ciclu, que va encetar tamién la necesidá de reformes nos ámbitos llaboral y universitariu.

    Manuel Menéndez, Paz Suárez Rendueles y Manuel González Díaz

    El catedráticu d'Economía Financiera y Contabilidá de la Universidá d'Uviéu, Manuel Menéndez, foi l'encargáu d'abrir les Xornaes "Les reformes pendientes n'España", con una conferencia sobre'l sistema financieru español. El tamién presidente de Cajastur, ya del bancu resultante de la fusión d'esa entidá con Caja Estremadura y Caja Cantabria -Liberbank-, confesó en primer términu qu'esperaba llegar a la cita con noticies más optimistes. Según Menéndez, el sector bancariu va enfrentar en curtiu un importante axuste d'empléu y oficines.

    La conferencia de Menéndez encuádrase dientro de les Xornaes "Les reformes pendientes n'España": una inciativa del CEI de la Universidá d'Uviéu, acoyida pola Facultá d'Economía y Empresa. La vicerrectora de Campus d'Excelencia Internacional, Paz Suárez Rendueles, destacó la patente actualidá de los temas a encetar nes Xornaes (reformes del sector financieru, del mercáu de trabayu y de la Universidá). El decanu de la Facultá anfitriona del ciclu, Manuel González Díaz, glosó'l perfil de Manuel Menéndez y destacó ante l'audiencia qu'enllenaba l'Aula Magna del centru la oportunidá d'escuchar a un ponente de tanta relevancia respecto al tema a tratar.

    Manuel Menéndez estremó la so intervención en cuatro bloques. Nel primeru, describió la situación antecedente a la crisis económica, con una fuerte crecedera del creitu ente los años 2000 y 2008, que coincidió hasta 2006 con unos tipos d'interés "demasido baxos" y que se concentró nel sector inmobiliariu, ensin ameyorar la productividá y empeñando a les families. Coles mesmes, el sector bancariu incurrió, según Menéndez, nun escesu de capacidá".

    El presidente de Cajastur faló depués de los distintos detonantes de la crisis: los sos episodios internacionales y la posterior llegada a España, cola pinchada de la "burbuya inmobiliaria". Detúvose depués en "el problema del interbancario": ante les grandes incertidumes del periodu de crisis, los bancos prefirieron depositar la so lliquidez nel BCE y nun s'empresten dineru ente ellos. El BCE sustitúi asina a los mercaos con mecanismos de lliquidez al curtiu plazu, pero con grandes ineficiencias nel procesu de fixación de precios.

    Pasó depués a describir les distintes midíes coles que la situación encaróse n'España dende los poderes públicos: midíes pa reforzar la solvencia de les entidaes financieres, pa forzar un procesu d'afitamientu y p'aselar a los mercaos. Ente elles, les qu'obligaron a les caxes d'aforru a fundise y desvenceyar más la so xestión de la representación política.

    Na actualidá, sía comoquier, el sector bancariu n'España sigue sobredimensionado y afectáu pol pesu del stock inmobiliariu nos sos balances. A tou ello haise xuníu l'airada de la crisis de delda soberana, un factor d'inestabilidá internacional tamién d'urxente resolvimientu. Por tou ello, Menéndez agora un futuru inmediatu difícil pal sector financieru, que va pasar na so opinión por un amenorgamientu d'oficines y plantiyes.

    El ciclu va siguir el próximu 12 d'avientu con una mesa redonda dedicada a la reforma del mercáu de trabayu.

    Documentos Rellacionaos:


Buscar